Shillong, Jylliew
Ka Hynñiewtrep Youths’ Council (HYC) – Shella Area Unit, Umwai Unit bad Jatap Unit ka la pynlong ïa ka Tur Shaphrang Academic Excellence Award 2026 ha St.Ursula Border Area Higher Secondary School, Mawlong, ban pynkupburom ïa ki Samla pule ba kynsai tam na ka thaiñ Ri-War Shella, kiba la pass bha ha ka eksamin SSLC 2026.
Ïa kane ka prokram la pynshit pynshngaiñ lyngba ka jingwan jingïashim bynta jong u Bah Roy Kupar Synrem, President ka HYC-Central Executive Council (CEC), uba long ruh kum u Kongsan.
Ha kane ka sngi la wan ïa shim bynta shitrhem da ki Samla pule, ki nonghikai na bun tylli ki skul, ki kmie ki kpa bad ki bahaïing hasem jong ki Samla ba la shah pynkup burom, ryngkat ruh bad ki rangbah na bun ki shnong, kaba pyni ïa ka jingïatylli bad ka jingangnud jong ka imlang sahlang, ban kyntiew ïa ka pule puthi bad ka jingjop ha ka jingpule.
Ha ka jingïalang, u Rangbah R. Sarubai, Rangbah Shnong ka Shnong Shella u la ai jingkren bad ban jur ïa ka jingdonkam jong ka pule puthi bad ka jingtrei shitom kum ki nongrim ban tei ïa ka lawei kaba phyrnai jong ki Samla.
U Bah Donbor Marbaniang, u Rangbah Tyrna, u la ai ruh ïa ka jingkren kaba pynshlur ïa ki Samla, ba kin trei shitom ha ka pule puthi bad ha kajuh ka por ba kin bat skhem ïa ki kolshor, ka riti ka dustur bad ki jingïatylli jong ka jaitbynriew.
Haba kren na ka liang u Bah Roy Kupar Synrem, uba long ruh kum u Kongsan u la ai ka jingïaroh bad jingkhublei ïa ki Samla pule, halor ka jingjop kaba ki la ïoh lyngba ka jingïaleh shitom, ka jingkut jingmut bad ka jingaiti lut ha ka pule puthi.
U la ai jingïaroh ruh ïa ki kmie ki kpa, ki nonghikai bad ïa baroh kiba la kyrshan bad ai mynsiem ïa kine ki Samla.
Namarkata, u la kyntu ïa ki Samla ba la shah pynkup burom, ba kin bteng ïa ka jingpule sha ki kyrdan kiba kham shalor bad ban ïai trei shitom ban poi sha ka jingjop, kiba kham khraw ha ka jingim jong ki.
Ha kane ka prokram, 32 ngut ki Samla pule ba kynsai na bun tylli ki skul ha ka thaiñ Ri-War Shella, kiba la shah pynkup burom da ki memento bad da ka song pisa, kum ka dak ban ithuh bad ai jingïaroh ïa ka jingjop kaba khraw jong ki ha ka eksamin SSLC 2026.
Ka HYC Shella Area Unit, Umwai Unit bad Jatap Unit ka ai khublei kyrpang ïa baroh ki nongnoh synñiang, ki nongkyrshan, ki jaka pule, ki Rangbah Shnong bad ki volunteer, kiba la ai ka jingïatreilang bad jingïarap kaba pura kaba la pynlong ïa kane ka prokram ban long kaba jop.
Ka Council ka pynskhem biang ïa ka jingkut jingmut jong ka, ban dang bteng ban kyntiew ïa ka pule puthi bad ban ai mynsiem ïa ki Samla ba kynsai ha ka thaiñ Ri-War Shella, lyngba kum kine ki prokram ha ki snem ban wan.
