Shillong, Nailur 17
Ka Myntri ka tnad ka koit ka khiah, ka Dr. M. Ampareen Lyngdoh ha ka Sngi Ba-ar ka la kyrpad ïa kiwei ki jaidbynriew ban ym pynthut ïa ka lariti bad ka riti-dustur jong ki nongshong shnong ka Jylla.
“Ka jingsngew jong nga halor kane…nga la dep kren bad ngan ong biang…ka Meghalaya ka dei ka Jylla jong ka suk ka saiñ, ngi don la ka jong ka lariti bad ka riti-dustur. Kumba ngi, ngi hap leit sha kawei pat ka Jylla, ka pynlong ïa ngi ban burom ïa ki jingsngew jong kata ka Jylla kaba ngi leit, ngi kyrpad ïa kiwei ruh ban ym pynthut ïa ka lariti, ka rukom kaba ngi ju leh bad ki riti-dustur jong ngi,” la ong ka Dr. Lyngdoh haba kren sha ki lad pathai khubor.
Ka Myntri ka la ong ïa kane haba pynpaw ïa ki jingsngew jong ka haba kylli halor ka jingthmu jong kawei ka kynhun niam ban pynlong ïa ka jingïaid ‘Yatra’ ha ka 2 tarik u Risaw ha nongbah Shillong.
Ka la ong ruh ba kiwei ki lah ban don ka jingsngew halor kaei-kaei, hynrei lada ka wanrah ïa ka huri-hura, kata kim don hok satia ban leh kumta.
“Ngi don ïa ki aiñ bad nga sngew ba ka aiñ kan ïeng rasong bad ngim lah ban shah ïa kine ki drama politik ban pyndiaw ïa ka suk ka saiñ jong ki nongshong shnong ka Jylla,” ka la ong.
Haba kylli, ka Myntri ka la kyrpad sha baroh kiba dei khmih ban burom ïa ka riti-dustur bad ki rukom leh jong baroh ki nongshong shnong ka ri.
“Wat pynbor ban khang ïa kaei-kaei ne pynsaphriang ïa kaei-kaei ka bym ïahap hapoh u pud u sam jong ka Jylla jong nga,” ka la ong.
“Ka dei tang ka jingkyrpad, bad nga kyrpad ruh ba ngin pynneh ïa kane ka burom markylliang khnang ba ka India kan ïai long ka synshar paidbah kaba riewspah kumba ju long, bad kan ïai bteng ban long,” la ong ka Dr. Lyngdoh.
Ha kawei ka liang, ka la pynpaw ka jingsngewkhia naba kita kiba mut wan, ki wan kum ki nongwankai sha ka Jylla hynrei ki pyrshang pat ban pynsaphriang ïa kaei-kaei kaba ktah ïa ki jingsngew jong ki nongshong shnong ka Jylla.
“Kiar na kane bad burom ïa ka synshar paidbah jong kane ka ri,” ka la ong.
Shuh shuh ka la bynrap, “Ngi long ka Jylla kaba sngewthuh ïa ka jingngeit niam jong kiwei bad nga ngeit ba uno-uno uba pyrshang pynthut ïa kane ka suk ka saiñ kaba ngi don ha ka Jylla jong nga dei ban leh eiei bad nga ngeit ba don ki aiñ kiba ïeng rasong ki ban pyntikna ba ka jingmut ba bha kan jop.”
