Shillong, Nailur:
Kawei na ki kynhun kaba wad ïa ka sap ka phong jong ki khynnah kaba heh tam hapoh ka Ri India ïa kaba la tip kum ka ‘College Ke Tashanbaaz’ ka la wan ha Shillong, ha kaba ka la don ka jingpyni ïa ki sap ki phong na ki kolej jong ka sor Shillong kaba kynthup haduh 33 tylli ki kolej bad kaba la long ha palat 300 tylli ki kolej, ha kaba la ai lad ïa ki khynnah ban pyni ïa ki sap jong ki ha ki bynta bapher-bapher kum ka rwai, ka shad, ka stand-up comedy, bad ka jingpyni ïa ka ktien.
Ïa ka Grand Finale jong ka College Ke Tashanbaaz kaba la pynïaid da ka Red FM la pynkut noh ha ka 14 tarik Nailur 2024 ha Seng Khasi College. Ka Ace Merakis kaba dei ka kynhun shad na Shillong Commerce College ka la ïoh rah ïa ka nam jop bad khur ïa ka kyrteng ‘Tashanbaaz’ jong u snem 2024.
Ha kane ka jingpyni sap kaba la ïaid lyngba 10 tylli ki kolej ha Shillong, la jied ïa ar ngut ki nongjop na man la ka kolej ban ïashim bynta ha kane ka jingïakob ba pawnam kaba la ïoh pyni ïa ki sap bapher-bapher.
Ka Ace Merakis ka la pynshong shit ïa ki nongbishar bad ki paidbah ha kaba ki la ïoh rah ïa ka song pisa kaba T.11,000. U First Colour Lathong, uba dei u nongrwai na St. Anthony’s College, u la ïoh ïa ka Boom Boom Boomer Special Prize, kaba la pynkhlaiñ shuh shuh ïa kane ka sngi kaba don jingmut.
Ha katei ka sngi la don ryngkat lang ruh da ki nongtem bad nongrwai ba pawkhmat ka Jylla kiba kynthup ïa u nongrwai ba pawnam kum u Bah Aiborlang Marbaniang, u nongtem guitar bad uba dei u dkhot jong ki kynhun rwai ba paw ha Shillong kum ka Still Status, Awakening bad Fireflood ha ryngkat bad ka samla Bahun Marweiñ, kaba dei ka nongrwai bad nongthoh jingrwai ba pawnam bad kaba dei ruh ka Lecturer jong ka Economics, kiba la long ruh kum ki nongbishar ha kane ka jingïalehkai.
Da ka jingdonlang jong kitei ar ngut ki nongbishar kiba la ai jingtip bad ai jingmut ïa ki nongïashimbynta ka la nang pynkhraw bad pynbha shuh-shuh ïa kane ka jingïakob.
La plie ïa kane ka jingïalang da kaba ïoh jingkren na u Bah W.B. Rynjah, Principal jong ka Seng Khasi College, ka Station Head jong ka Red FM, ka Kong Jacqueline Thangkhiew, kaba la ai ruh ka jingkren kaba lyngkot ban pynpaw ïa ka jingsarong jong ka halor ki sap ki phong kiba la pyni da ki samla bad ïa ka jingjop jong kane ka jingïalang.
Shuh shuh ha katei ka sngi ka la don ruh ka jingai jingtip lyngkot halor ka jingpang HIV/AIDS da ka Meghalaya AIDS Control Society (MACS) Shillong.
La pynwai ïa ka jingïalang da ka jingai khublei na u Bah H. Rynjah, Assistant Professor jong ka History Department ha Seng Khasi College, ha kaba u la pynpaw ïa ka jingburom kaba khraw ïa baroh ki nongshim bynta bad kiba la pynurlong ïa kane ka jingïalang.
Da kane ka College Ke Tashanbaaz, ka Red FM ka la ai shuh shuh ïa ka lad kaba khraw ban pyni ïa ki sap jong ki samla Shillong, kaba pynneh ïa ka nam jong kane ka sor kum ka jaka ba khraw ha ka jingpynpaw sap bad jinglah jong ki samla.
