Jowai, Nailur 17
Ka Seiñraij Mynsoo ha ka Lah Sngi U Blei ka la pynkut noh ïa ka lehniam Behdeinkhlam ba shisien shisnem hapdeng ka iphuh-iphieng bad jingïashim bynta ki khun ka Raij ryngkat ka jingshad bad ka jingrah lang ïa ki dieng ‘Kymphui’ ïa kiba la ot pynwan dur bad pynitynnad bha.
Ha une u snem kane ka lehniam Behdeinkhlam hapoh ka Raij Mynsoo la sdang ïa ka naduh 11 tarik Nailur da ki jinglehniam bapher bapher ba la pyndep da u Lyngdoh ryngkat u Chutia.
Ha shwa ka jinglehniam ka la don ka jingïalang lyngkot ha ka jingdonlang u MDC ka JHADC Ma Eveningstar Teron kum u kongsan, u Dolloi ka Elaka Jowai Ma Puramon Kynjing nalor kiwei kiwei.
Ïa ka lehniam Behdeinkhlam hapoh ka Seiñraij Mynsoo la pynwandur ïa ka da ki rong ki rup kum ki ‘Deiñkymphui’ ba la wanrah da ki khun ka Niamtre na man la ki thliew ïing.
Ka lehniam Behdeinkhlam ka dei kawei na ki lehniam ban ainguh aidem ïa U Blei Trai kynrad ban long bha ka rep ka riang bad ban dap u khaw u kba bad ha kajuh ka por ban beh krat ïa ka khlam ka ngoh bad ki jingsniew hapoh ka imlang sahlang.
Ha ka sngi pynkut ïa ka suit ka shor kaba la pynmlien naduh ki longshwa mynshwa la pyndep da u Lyngdoh ha ïing Lyngdoh ha ka jingdonlang u pator, ki riew rangbah ka Raij kumjuh ka jingsynran lang ki khun ki hajar naduh ki khynnah rit haduh kiba la san.
Hadien ba la pyndep ïa ka suit ka shor ha ïing Lyngdoh, ki khun ka Raij ki la ïa mih paidbah kynthei bad shynrang ryngkat ka jingriew ka ksing ka bom bad ka jingrah lang ïa u dieng Kymphui kumjuh u Masi haduh ban da poi ha madan Myrneiñ ban pyndep ïa ka Kñia Syiemkhlam Syiemdait ba la pyndep da u Chutia.
