Khliehriat, Nailur 17
Ka FKJGP-Khliehriat Circle ha ka Sngi Ba-ar ha ryngkat ka jingsynranlang u Bah Deihok Sumer, President ka FKJGP-East Jaiñtia Hills lem bad katto-katne ki nongïalam ka seng, ka la leit ïakynduh ïa u SP ka East Jaiñtia Hills ban buddien halor kawei ka jingujor pyrshah ïa uwei u pulit SI uba ka seng kam kwah ban pynpaw kyrteng.
Ki daw ba ka seng ka ujor pyrshah ïa utei u pulit SI ka long hadien ba ki dkhot ki la leit buh ïa ka ejahar ha kine ki khyndiat sngi ba la dep ha Ladrymbai Police Outpost halor kawei ka jingjia shah tuh.
“Hadien ba ki dkhot ka seng ki la dep thoh ïa ka ejahar da ka ktien Khasi, utei u heh pulit pat u la bthah ïa ki nongujor ban thoh da ka ktien phareng,” la ong u President ka FKJGP-Khliehriat Circle, Bah Michal Chyrmang.
“Ynda la kylli da ki nongujor balei kumta ‘Sir’ namar baroh shi katta la thoh da ka ktien Khasi ruh ka biang mynta pat balei phim shah sa kawei ruh para Khasi phi lah ban sngewthuh la ong ki nongujor…utei u ophisar u la pynphai da kaba ong mynshwa ki shah mynta pat ka ‘Court’ ka la khang bad dei ban thoh tang da ka ktien Phareng,” la ong utei u nongïalam.
U Bah Chyrmang u la ong ba ha ka jingïakren ka seng bad u SP, utei u heh pulit u la ong bad kren shai hakhmat ki nongïalam ka seng ba kam don kum kata ka jingbthah ban thoh ïa ka ejahar tang da ka ktien Phareng.
“U SP u la ong ïa ka ejahar lah ban thoh da ka ktien Khasi, Pnar, Garo, Hindi bad ka dei ka kamram jong ki pulit ban pynkylla ktien pat ïa ka ejahar sha ka ktien Phareng. Na ka liang u SP u la kular ruh ban phah tohkit ïa katei ka jingjia khnang ba kan ym jia shuh nangne shakhmat bad ynda la dep tohkit, u SP un phah lang ïa ka kaiphod sha ka seng katkum ka jingong jong u,” u la ong.
Na ka liang ka seng ka ai khublei ïa u SP ka East Jaiñtia halor ka jingshimkhia jong u ïa ki jingeh ki paidbah namarba ki don bun ki bym tip ne sngewthuh ïa ka ktien Phareng bad ki paidbah ki khamsuk ban thoh da ka ktien Khasi naba dei ka ktien lajong.
Shuh shuh ka seng ka buh ka jingkyrpad ïa baroh ki pulit ba kum kine ki jingjia kim dei shuh ban jia nangne shakhmat bad ka seng ka maham ba lada dang lap kan sa leh da kaba tyngeh.
