Shillong, Nailur 18
Lai ngut ki briew ki la shah bat noh ha ki nongshong shnong jong ka Ishyrwat hadien ba la kynnoh ba ki la donkti ban dawa pisa na kawei ka ïing wai kaba don ha kane ka shnong.
Katkum ka khubor na ki pulit la ïathuh ba ha ka miet jong ka 14 tarik mynta u bnai, kata ha ka por kumba 8 baje eiei, kawei ka longkmie ka la pyntip sha ki pulit ba ki nongshong shnong jong ka Ishyrwat, Shillong ki la ïoh ban bat noh ïa ki lai ngut ki briew ba la tip kyrteng kum u Akshay Marbañiang (28 snem), u Subroto Boida (30 snem) bad u Freddy Mawrie (28 snem).
La ong ba ka jingbat noh jong ki nongshong shnong ïa kitei ki lai ngut ki briew ka long halor ka jingkynnoh ba ki la leit ban dawa pisa na kawei na ki ïing shong wai kaba dei jong u Matabur Rahman Laskar. Ïa kine ki lai ngut la aiti noh sha ki pulit na ka bynta ban leh ïa kaba donkam.
