Mynjur ka Kynhun Myntri u Modi ban pynlong ilekshon MP bad MLA ha kajuh ka por ha India baroh kawei

Baroh ki Ïingdorbar Thawaiñ jong ki Jylla kin hap leit sha ka ilekshon ynda la kut ka samoi treikam jong ka Parliament ka ban kut ha u snem 2029.

Shillong, Nailur 18

Ka Kynhun Myntri jong ka Sorkar Pdeng hapoh ka jingïalam u Myntri Rangbahduh, u Narendra Modi ka la ai jingmynjur ban pynlong tang kawei ka ilekshon ka ban sa pynlong ha kajuh ka por ïa ka ilekshon MP bad MLA ha baroh kawei ka ri India, lane ka ‘one nation, one election.’

Haba pynbna ïa kane ka rai sha ki lad pathai khubor ha ka Sngi Balang ha New Delhi, u Myntri ka Sorkar Pdeng, u Ashwini Vaishnaw u la ong ba ïa ka ilekshon ha ka ri baroh kawei yn pynlong ha ki ar tylli ki wat, kita, ka wat banyngkong bad ka wat ba-ar.

Ha ka wat banyngkong, yn pynlong ïa ka ilekshon sha Ïingdorbar Thawaiñ Lok Sabha bad Ïingdorbar Thawaiñ ki Jylla bapher bapher, bad ha ka wat ba-ar, yn pynlong sa ïa ki ilekshon kum ka ilekshon Municipal, Panchayat bad kiwei kiwei ki ilekshon bad dei ban pyndep hapoh 100 sngi hadien ba la pynlong ïa ka ilekshon Lok Sabha bad ilekshon sha ki Ïingdorbar Thawaiñ ha kylleng ki Jylla.

Ka Kynhun Myntri ka Sorkar ka la ai ka jingmynjur ban pynlong tang kawei ka ilekshon ha ka ri baroh kawei hadien ka jingai jingmut bad jingtyrwa kaba la wanrah lyngba ka kaiphod jong ka High Level Committee kaba la khlieh da u President barim ka ri, u Ram Nath Kovind.

Kum ban pynkynmaw, ka High Level Committee kaba la khlieh da u Kovind ka la phah ïa ka kaiphod sha ka Sorkar Pdeng ha u Lber mynta u snem 2024 ha shwa ban pynlong ïa ka ilekshon Lok Sabha mynta u snem.

Baroh ki Ïingdorbar Thawaiñ jong ki Jylla kin hap leit sha ka ilekshon ynda la kut ka samoi treikam jong ka Parliament ka ban kut ha u snem 2029.

Lada jia ba ka Ïingdorbar Thawaiñ ha kino-kino ki Jylla ki pynwai ïa ka samoi treikam shiteng por khlem pat kut ka samoi treikam san snem, ka jingpynlong ilekshon biang kan long tang ban pyndep ïa ka samoi treikam kaba dang sah, hynrei ïa ka ilekshon kaba thymmai yn pynlong lang biang ha kajuh ka por ynda la kut ka samoi treikam jong ka Parliament.