Shillong, Nailur 18
Ki pulit jong ka East Khasi Hills ki la ïoh ban kem noh ïa ki saw ngut ki briew halor ka jingkynnoh ba ki la donkti ban dawa pisa haduh T.10 lak na uwei u briew. Na kine ki saw ngut kiba la shah kem, ar ngut ki dei ki dkhot jong ka HNYM.
Ha ka kyrwoh khubor ba la phah da u Superintendent of Police (SP) ka East Khasi Hills u Bah Sylvester Nongtnger u la ïathuh ba ha ka 24 tarik u Nailar, 2024, ka la don ka jingujor ejahar ha thanat Madanrting ba ha ka 8 tarik u Nailar, 2024, uwei u briew ïa u bym lah ban ithuh u la phone ïa une u nongujor ejahar ha ka por kumba 7 baje janmiet na ka bynta ban dawa ïa ka pisa kaba long haduh T.10 lak.
Shuh shuh u SP u la ïathuh ba hadien kane, na ka liang jong utei u briew u la phone biang bunsien bad dawa ba ïa katei ka pisa kaba la dawa ba dei ban siew noh mardor. Hynrei hadien ba une u nongujor, um shym la kohnguh ïa kane ka jingdawa ban siew pisa, na ka liang jong utei u nong ‘phone’ ryngkat bad kiwei ar ngut ki paralok jong u, ki la leit ban rung jubor shapoh ka ïing jong utei u nongujor ha ka janmiet jong ka 20 tarik Nailar, 2024 ha ka por kumba 7 baje eiei, da ka jingthmu ban dawa pisa.
Hynrei hadien ba ki la rung shapoh ka ïing, bad kim shym la lap ïa utei u nongujor, uba khlem don satia hapoh ïing ha katei ka por, na ka liang kitei ki briew ki la byrngem-byrsit ïa ka khun kynthei ka jong u ban leh da kaba tyngeh.
Ha kaba ïadei bad kane, na ka liang jong ki pulit ki la pynrung mukotduma ïa katei ka jingjia ha thanat Madanrting. Ki pulit haba pynlong ïa ka jingtohkit ki la ïoh ban kem noh ïa saw ngut ki briew ba kynthup ïa u Garnett Gedian Khongwir, 30 snem ka rta bad u Kyrshanbor Lyngdoh, 38 snem kiba dei ki dkhot ka HNYM lem bad u Thounaujam David Singh, 41 snem ka rta bad u Narendra Kabrambam, 29 snem ka rta.
Halor kane ka jingïoh kem ïa kitei ki briew, na ka liang jong u SP u la pyntip ba ka jingtohkit halor katei ka jingjia ka dang ïaid shakhmat ban wad ïa ki daw tynrai baroh.
