Shillong, Nailur 18
Ki nongñiah kali ‘Tourist Taxi’ hapoh ka shatri jong ka All Khasi Meghalaya Tourist Taxi Association (AKMTTA) ha ka Sngi Balang ki la rai ban phah da ka shithi sha u Myntri Rangbah ka Jylla, u Conrad K. Sangma ne ka ‘Open Letter’ ha shuwa ban shim ïa kiwei pat ki sienjam ïakhih kiba kham tyngeh namar ka jingsngap mynthi ka Sorkar Jylla haba ïadei bad ka jingdawa jong ki.
Nalor kane, ka seng ka la rai ruh ban pynlong da ka jingsangeh kamai, ka ‘Peace Rally’ lada katei ka ‘Open Letter’ kam seisoh.
Ha kajuh ka por, ki nongñiah ‘Tourist’ ki la shim ruh ïa ka rai ban pynlong da ka jingïakhih shah thngan lada ka Sorkar kam sngap satia ïa kitei 3 tylli ki sienjam ban pynurlong ïa ki jingdawa ka seng.
“Haba ngi la wan da ka jing jai-jai lyngba ka AKMTTA, Balei phi leh kumne? Balei ngi hap mih sha madan? Balei ngi hap ban khot jingïalang kumne? Phim tip ïa ka jingeh ba ngi ïashem…katno sien ngan pyrshang na ka liang jong nga u President,” la ong u President ka AKMTTA, Bah Ricaldinus Dohling haba kren ha ka jingïalang kaba la long ha Madan Malki.
U la kynthoh ruh ïa ki Myntri Sorkar kiba la pynkhamti ban shakri na bynta ka bha ka miat jong ka ri bad ka jaidbynriew naba ïa ka jingeh barit jong ki nongñiah kali, ka Sorkar kam lah ban khot noh sha ka miej ïakren.
“Phi ong ba ka jingkhang Secretariat ka plie na bynta ki nongshong shnong ka Jylla…te balei pat haba ngi la leit da kaba jai-jai bad da ka akor ka burom, phim sngap…phi kwah ba ngin leh kumno,” la buh jingkylli u President.
U la ong ruh, “Phi la ïohi ïa ka jingïalang jong ngi, khot noh, wat leh mynthi. Lada hadien kane ka jingïalang phim lah ban khot bad ïawer noh ïa ngi ki nongïalam, ngin shim ïa ki sienjam kiba kham tyngeh.”
Na ka liang jong u, u la ong ruh ba lada ka Dawki, ka Sohra, Mawlynnong bad kiwei-kiwei ki jaka jngoh kai ka Jylla ki don sha Assam, ki nongñiah kali na Meghalaya, kin kut tang ha Jorabat.
“Khot noh katne ngi la ïalum…kaei kaba donkam ka long ba phin khot sha ka miej ïakren kumno ban pynbeit bad pynshai halor kane ka mat jingïakhih na bynta ban thaw ïa ki aiñ ban ym shah shuh ïa ki kali ba nabar Jylla ha ki jaka jngoh kai,” u la ong.
Haba ban biang ba lada ka Sorkar ka dang mutlop bad sngap jar halor ki jingdawa ka seng, u la ong ba u long uba kloi bad ki paralok ban leit thiah hakhmat Additional ne Main Secretariat ban shah thngan katba ka Sorkar kam pat khot ïa ïakren ïa ki nongïalam ka seng.
“Nga long uba kloi ban ieh ïa ki bahaïing bahasem ban shah thngan na bynta ka mat kaba ngi dei ban ïoh hok kum ki nongñiah kali,” la ong u Bah Dohling.
Kum ban shu kdew hangne, ka seng ka kwah ba baroh ki kali kiba wan na kiwei pat ki Jylla ba kin sangeh noh ha ISBT – ym ban pynsangeh ïa ki ban wan sha ka Jylla, hynrei ba kin sangeh noh ha ki jaka ba la buh – ISBT ne kiwei-kiwei ki jaka kaba ka Sorkar kan pynbiang bad na kita ki jaka, ki kali napoh ka Jylla kin sa kit pat ïa ki briew, ki nongshang kai sha ki jaka jngoh kai.
