Shillong, Nailur 19
Ki nongïalam jong ka Meghalaya Film Maker Association Ri-Bhoi Unit hapoh ka jingïalam u Bah Lansius Syiemlieh kum u President bad u Bah Jamberson Marak kum u Secretary, ki la leit ban ïakynduh ïa u Deputy Commissioner ka Ri Bhoi District, u Abhilash Baranwal ban kyrpad ban ai jaka lem ïa ki samla kiba don sap na Ri Bhoi ba kin rwai, kin shad bad ban ak ha ka tamasa Cherry Blossom ka ban long ha u Naiwieng ha Bhoirymbong mynta u snem.
Hadien ka jingïakynduh ïa u Deputy Commissioner ka Ri Bhoi, u Bah Lansius Syiemlieh u la pynpaw ïa ka mynsiem jong ka jingsngewkhia na ka bynta ki samla kiba don sap (Local Artist) ka them Ri Bhoi kiba ju shah kyntait ban ai rynsan ha kino-kino ki tamasa bad kham tam ha ka Cherry Blossom kaba long ha Ri Bhoi mynshem snem kim shym la ïoh lad ban shim bynta hynrei la ailad tang ïa kiwei ki samla kiba na shabar ka District.
U la ïathuh ba u DC u la kular ban shim khia ïa kane ka kam hadien ba la dep aiti da ka jingthoh bad kum ka kynhun ki nongshna phlim ne ki nongak phlim ki la pynpaw ruh ba kim pyrshah ïa ki barikor (artist) ba wan na shabar hynrei ka kynhun ka kwah ba ka sorkar ka dei ban ailad ruh ïa ki samla na Ri Bhoi ban ïoh rynsan ha katei ka tamasa Cherry Blossom.
U Bah Lansius u la pynpaw ba ki nongshna phlim kim don kano-kano ka jingpyrshah ïa ka jingwanrah ïa kino-kino ki tamasa ha kane ka district, hynrei kum ka kynhun ka angnud ba lada ki ïoh rynsan ka long shi bynta ban kyntiew ïa ki sap ki phong jong ki haba ïa ka tamasa la pynlong ha Bhoirymbong kaba hap ha Ribhoi District.
