Shillong, Nailur 19
Ka Khasi Students’ Union Employment Monitoring Cell ka la dawa na ka Sorkar Jylla lyngba ka Meghalaya Public Service Commission (MPSC) ba ka dei ban thung kam ïa ki briew kiba nang ban kren bad thoh ïa ka ktien Khasi khnang ban suk haba treikam bad ki paidbah ka jylla.
Kane ka mat kaba ka seng ka la wanrah ka dei kawei napdeng 20 tylli ki mat ba ka seng ka la thoh ha ki kot lyngkdop kaba la sam sha ki paidbah ha ka Sngi Palei ban pynsngewthuh haba ka seng ka la dep phah ïa ka dorkhas sha u Myntri Rangbah ka jylla u Conrad K Sangma.
Kane ka jingsam kot lyngkdop ha kane ka sngi ka long sha ki samla pule, ki nongleit-nongwan ha ïew ha hat bad ruh sha ki district khnang ban pynsngewthuh sha ki paidbah shwa ban jam da kiwei ki sienjam.
Haba ïakren bad u samla Reuben Najiar uba dei u Chairman ka KSU Employment Monitoring Cell, u la ïathuh ba ka seng ka la dep phah dorkhas lut sha baroh ki MLA ba kin ïakren ha kane ka dorbar synrai hynrei kam shym la kot ka jingshim rai ban pynbha ïa ka rukom thung kam ha MPSC.
U la ïathuh ba napdeng kine 20 tylli ki mat, ka seng ka dawa ban thung Chairman bad ki dkhot ka MPSC ki bym don bynta bad ki ‘riew saiñ pyrthei.
Nalor kane, u la ïathuh ba ka seng ka dawa ba dei ban pynlong eksam MCS man u snem bad dei ban pynbna paidbah ruh ïa ki jingdon-jingem jong ki haba ki shah thung kam ha ka ‘website’ khnang ba lada ka kiew ka jingïoh jong ki dei ban tohkit.
Katkum ka kot lyngkdop kaba la sam da ka seng sha ki paidbah, ka mat kaba nyngkong ka la ong ba ki Chairman bad ki dkhot barim bad mynta jong ka MPSC ki don ka jingïadei bad ki seng saiñ pyrthei ha kajuh ka por kane ka ktah ïa ka rukom thung kam thung jam namar ba ki hap ban kohnguh ïa ki kynrad seng saiñ pyrthei jong ki. Kane ka wanrah ïa ka jingpynrung kam ïa ki briew la jong bad ha ki katto-katne ki khep ka pynshlur ruh ïa ka jingthong tyngka pliah bad jingbamsap.
Sa kawei ka mat ka dei ka jingpynbna man u snem ïa ka jingdon ki nongtrei MPSC, namar kane ka dei ka atiar kaba kongsan ha ban ïaleh pyrshah ïa ka bamsap da kaba lumthup ïa ka jingdon-jingem jong ki ban bishar bad tohkit bniah la ka don ne em ka jingkiew syndet ha ka jingdon-jingem.
Ka jingthaw ïa ka tnad peitngor bad pyrshah bamsap kaba khot Anti Corruption Directorate namar kane ka jingjyllei ka bamsap ha ka thung kam thung jam, ka jingdawa pisa, ka jingleh shiliang khmat bad kiwei kiwei ki kam kiba ju jia na ka por pyrshah ïa ki nongthep kam.
Ki nongthep kam ki dei ban long ki nongshong shnong jong ka jylla Meghalaya bad ki dei ban nang ïa ka ktien Khasi bad Garo ban lah aplai ïa kano-kano ka kam namar kiba bun ki jylla ki la dep ban bud ïa kane ka kyndon ban ailad tang ïa ki briew jong ka jylla lajong katba ha Meghalaya ki briew na kiwei pat ki jylla ki lah ban thep kam thep jam ha jylla bad kane ka long ka jingïoh-roit ïa ka hok jong kiba sah ha Meghalaya.
Dei ban pynlong ïa ka eksam man u snem bad man ka por ban ailad ïa ki samla ban pynkhreh lypa ïa kum kine ki eksamin namar kumba long mynta ïa ki kam ba thylli dang pynbna hadien san haduh phra snem.
Nangta dei ban pyni paidbah ïa ki ‘mark’ ba la ïoh da kiba ïakhun ïa ka eksam.
Ka Department Personnel & Training ka Sorkar India ha u snem 2016 ka la pyntip ba ka jingpynrung kam dei ban pyndep hapoh 6 bnai naduh ka tarik ba la dep pynbna hynrei ïa kane ka aiñ ym shym la pyntreikam ha Meghalaya.
Kumjuh ruh ka Sorkar India ka la pynduh ïa ka ‘personal interview’ naduh u snem 2016 ha ka kyrdan B shapoh hynrei ka MPSC bad ka Sorkar Jylla ki dang bteng ban leh ïa kane ban ai jingmyntoi ïa ki kyrtong jong ki.
