Shillong, Nailur 19
Tang hapdeng ar taïew, ar tylli ki jingjia ba jah briew na la ïing ki la poi pynban sha ka jingduh ïa ka jingim kaba ym lah satia ban tip ïa ka daw.
Dang shen, ha ka 7 tarik mynta u Nailur, kawei ka longkmie kaba la kham noh ka rta ka la jah na la ïing na Nongmensong hynrei tang ha ka sngi kaba bud, kata ha ka 8 tarik, la lap pynban ba ka la khlad noh bad ïa ka met la lap na Umïam.
Na ka liang ki bahaïing bahasem ki sah ha ka lyngngoh namar kum kane ka jia ha ka ïing ka sem khamtam ban khlad noh tang hadien khyndiat kynta ba la jah na ïing.
Mynta pat sa kawei ka jingjia kaba jan ïasyriem ka la jia sa ha Mawlai Mawïong Umjapung ha kaba kawei ka longkmie kaba la mih na la ïing bad iwei i khynnah ha ka nohphai sngi jong ka 18 tarik Nailur ka la jah khlem wanphai shuh sha ïing. Hynrei ha ka sngi kaba bud, kata ha ka 19 tarik la lap pynban ïa ka met ïap jong kine ar ngut na ka wah Umshing kaba don hapdeng ka NEHU bad Mawïong.
Kine ki jingjia ki pynkyndit ïa kiba bun ki nongshong shong bad ki mih shibun ki jingkylli halor ka jingjah jong ki na ïing kaba pynpoi shaduh u pud ban duh pynban ïa la ka jingim.
Ki pulit ki dang pynlong ka jingtohkit halor kane ka jingjia bad ym pat lah satia ban tip ïa ka daw ba ki jah na ïing bad kaei kaba pynlong ba kin ïap bad poi sha wah.
Ka jingjah briew ka dei kaba jia jan man la ka por ha kylleng ki jaka bad ki don kiba jah na ïing ki wanphai biang sha la ïing bad don pat ki bym lap shuh syndon.
