Shillong, Jylliew 16
Ha ka step jong ka 16 tarik u Jylliew, 2026, ka Khasi Students’ Union (KSU), ka la ïoh ban bat ïa san ngut ki nong Bangladesh, kiba la wan rung beaiñ sha kane ka Jylla.
Ha ka jingïakren bad u Samla Cleenstar Shabong, Organising Secretary ka KSU, CEC, u la ong ba ïa kine ki nong Bangladesh la ïoh ban bat da ki dkhot ka Jaïaw Circle, katba ki dang thmu ban pan kam na ki dkhot kiba don hajan Lum Survey bad mar ïa tip ba kidei na Bangladesh, na ka liang ki dkhot ki la bat ïa ki.
U la ong ba napdeng kine ki san ngut, saw ngut ki la ïoh ban phet krad noh, katba u wei pat u la mareh lymwir sha ki thaiñ Jaïaw, ha kaba na ka liang ki dkhot ki la ïoh ban bat ïa u bad ban ïalam sha ka ophis treikam ka seng kaba don ha Jaïaw.
U la pyntip ruh ba une u nong Bangladesh, um don satia ïa ki kot ki sla kiba biang bad haba tohkit u la ïathuh ba ki don da ki spah ngut kiba la wan lang bad u da ki trok, da kaba rung lyngba ka khappud Dawki, kiba la siew mar 2-3 hajar tyngka sha ki Dalal.
U Samla Cleenstar u la maham jur ïa ki Dalal kiba leh ïa kane ka kam bad kumjuh ruh ban dawa na ka Sorkar ban pyntreikam noh ïa ka Inner Line Permit (ILP).
Une u Bangladeshi u la kubur ba ki la siew mar 2-3 hajar tyngka sha ki Dalal, tang ban ïoh rung ha Meghalaya-India. “Kaei pat ka jingthmu jong kine ki briew ba nabar ban rung shapoh ka Jylla jong ngi. Ngi kwah ba ka Sorkar sa shisien kadei ban ai noh ïa ka ILP,” la ong u Samla Cleenstar.
U la bynrap ruh da kaba ong “Ka KSU man ka por ka ju ïai dawa ïa ka ILP, ba lada la long aiñ ka ILP, ngi la lah ban tehlakam ïa ka jingwan rung beaiñ ki briew ba nabar.”
