Shillong, Jylliew 16
Ka Anti-Narcotics Task Force (ANTF) jong ka Jylla ka la ïoh kem ïa 3 ngut ki suba nongkhaïi drok na Assam ha ka jingkhynra ‘Naka’ kaba la long ha Tikrikilla, West Garo Hills District ha ka 15 tarik, Jylliew.
Ha kajuh ka por, la ïoh ban kurup haduh 53 gram u drok ba suba dei u ‘Heroin’ ha ryngkat ki kali bad ki ‘Mobile Phone’.
Ha ka jingpynbna ba la pynmih ha ka Sngi Ba-ar, u SP ka ANTF, u Vikash Kumar u la ong ba ïa kane ka jingkhynra la pynlong “da kaba pynshong nongrim ha ki jingtip ba shaniah ba la ïoh lum”.
Ha ka jingtalasi ba la pynlong katkum ka aiñ NDPS, ka kynhun ka la lap ïa “5 tylli ki synduk sabon plastik ba suba ba dei u drok ‘Heroin’ (uba khia 53 gram), 2 tylli ki thuk-thuk bad 3 tylli ki ‘Mobile Phone’.”
Kitei ki briew kiba la shah kem ki dei kiba la tip kyrteng kum u Sahidul Hussain (35 snem ka rta) na Gumajhar, Simlabari, Goalpara, u Saddam Hussain (35 snem ka rta) na Rajmita Pantai, PS Lakhipur, Goalpara bad u Rashidul Hoque (23 snem ka rta) na Chataimari, PS Lakhipur, Goalpara.
Ha kaba ïadei bad kane ka jingjia, la pynngat mukotduma katkum ka aiñ NDPS ha thanad Tikrikilla.
U SP u la ong ba ïa kine ki 3 ngut la “suba ba ki dei shi bynta jong ka kynhun runar kaba kham heh kaba pyntreikam ïa ki jingkhaïi drok hapdeng ki Jylla” bad ba ka ANTF ka dang “tohkit ïa kane ka kam na ka bynta ki jingïadei ba shakhmat bad shadien.”
Na ka liang ka tnad, ka la kyrpad ruh ïa ki paidbah ban wan shakhmat ha ryngkat ki jingtip ba ki don.
“Lada don kino-kino ki briew kiba don jingtip shaphang uba shah kynnoh, ki paralok jong u lane kino-kino ki runar kiba donkti ha ka kam khaïi drok, lah ban ïasam ïa ki jingtip sha ka Meghalaya ANTF. Yn buhrieh ïa ka jingithuh bad yn ai ruh ïa ka khusnam kaba biang sha kum kine ki nongtrei mon sngewbha,” u la ong.
