Jowai, Jylliew 16
Ka Khynroo Khyllood Committee, Seiñraij Jowai kum ka dak ka jingkynmaw ieit bad burom ïa u (L) Kambel Shullai ba long u nongshem bad nongpynwandur (architect) ïa ka Eco-Friendly Crematorium, ha ka 16 tarik Jylliew kaba dei ka sngi khlad jong u, ka la pynlong da ka jingïakynduh lang ha Madan Bam Kñia Pyrthat, Poh-hali.
Ha kane ka prokram nalor ki khynnah skul, ki nonghikai ka Seiñraij Higher Secondary School, Jowai, ki riew rangbah ka Seiñraij la wan ruh ban ïadonlang da ka kurim u Ma Kambel, Kong Yoolan Niangti bad ki bahaïing hasem.
Ha ka jingïalang ba la pynïaid da u Bah Bankyrshan Kharbuki, Chairman KKC Seiñraij la ïoh ka jingbuh Syntiew ha u Mot Dur Sah Kynmaw jong u Ma Kambel da u Bah Puramon Kynjing, Dolloi Elaka Jowai bad ki bahaïing hasem u Ma Kambell bad pynbud pat sa da ka nguh ka dem da u Bah Wanda O Lakiang, Wasan ka Raij Jowai.
U Bah H. Toi, President Seiñraij ula kren haka jingïadei bad ki kam ba kynsai kiba u Ma Kambel u la leh kum u briew ba don shisha ka sap ba kyrpang bad ka jingkitkhlieh na ka bynta ka bit ka biang jong ki khun ka Niamtre-Niamtynrai.
Shuh shuh u la ong ruh ba ka jinglong shisur bad ki kam ba ratbah u Ma Kambel, khamtam ha ka jingïadei bad ka Eco-Friendly Crematorium ki long ka nuksa ba bha ïa ki khun samla kane ka juk.
Katba u Bah Puramon Kynjing, Dolloi Elaka Jowai u la ai ka jingkren kyrpang halor ka phang “I tip I Shemphang wa kyrshan yei suk, ka luti wow biang ki kam niam ka patein”
La ïoh ruh ka jingkren na u Bah Pynskhem Shullai uwei na ki pyrsa u Ma kambel bad la pynkut ïaka jingïalang da ki kyntien khublei na u Bah Sajon Ksiar Langdoh, Secretary KKC, Seiñraij, Jowai.
