Nongstoiñ, Jylliew 16
Hadien ka jingïamih paidbah jong ki paidbah nongshong shnong ka thaiñ Ri Mulliang ha kine ki khyndiat sngi bala lah ban pynpaw ïa ka jingpyrshah ban rah ïa ka Ri Mulliang C&RD Block na Nonglang sha Tynghor, ha ka sngi Ba-ar ki Synjuk Nongïalam Shnong na ki saw tylli ki Hima kiba hap hapoh ka Ri Mulliang Block ba kynthup ïa ka Hima Jyrngam, Hima Nongmynsaw, Hima Riangsih bad ka Hima Nonglang ki la ïa lum lang ha shnong Tynghor.
Ïa katei ka jingïalang la ïalam da u Sirdar Jyrngam Sirdarship Bah Nasar Syiem bad ka jingthmu ka long ban pynpaw ïa ka jingsngewnguh halor ka jingpynbna ka Sorkar lyngba u Symbud Myntri Rangbah Bah Prestone Tynsong dang shen ha ka jingïalang ha Rambrai ha kaba ka Headquarter jong ka Ri Mulliang C&RD Block kan long ha shnong Tynghor.
Ha kane ka sngi nalor ki nongïalam shnong la wan ban ïa shimbynta ruh da ki riew rangbah Khasi bad Garo kynthup ïa u Bah Oral Marthong Sordar Shnong Tynghor, Bah Newtar Nonglang na thaiñ Langpih, Bah Bessralding Syiemlieh na Langja, Spren G Momin, President Achik Holistic Awakening Movement (AHAM) Aradonga Regional Unit, Bah Distarborlin Wanniang, Nongaiktien jong ka Synjuk bad kiwei-kiwei.
Haba ai jingkren ha kane ka sngi, ki nongkren ki la pynpaw ïa ka jingai khublei bad sngewnguh ïa ka Sorkar MDA II halor ka sienjam kaba la rai ban buh ïa ka Headquarter jong ka Ri Mulliang C&RD Block ha shnong Tynghor kaba dei ka jaka pdeng ïa baroh ki shnong kiba hap hapoh kane ka Block.
U Bah Distarborlin Wanniang u la pynpaw ïa ka jingsngewhun ïa kaei kaba ka Sorkar ka la shim ïa ka rai ym ban pynhun ïa uwei ne ar hynrei na ka bynta ban pynjan sha baroh.
“Nga ai khublei ïa ka Sorkar lyngba ka jingshimkhia khamtam ïa ki bor pynïaid District kiba la phah ïa ki kaiphod kiba biang tam ha kaba ka Sorkar kala sngap ïa kaei kaba u paidbah u angnud,” ong u Bah Distarborlin bad bynrap “Kumno ngin buh kat ïa kata ka block kaba long ha khlieh ne ha kjat, ngi hap peit ïa ka suk lang ïa baroh bad kaba kham long pdeng.”
U la ong ruh ba dei halor kane ka nongrim, khlem ka jingsngew pher jaidbynriew khlem da kynthoh ïano-ïano hynrei ban ïatreilang ban ai ka kti ka mon, kti kadiang na ka bynta ka bha ka miat ka roi ka par jong ka dong ka thaiñ.
U Bah Distarborlin u la pynpaw ba ka jingplie ïa ka Block saw snem mynshwa ha Nonglang ka dei tang ka ophis ba shipor namar ym pat ïoh ïa ka jaka ba biang bad ha kine ki saw snem ka Sorkar ka la wad ïa ka jaka ba biang ban buh ïa ka ophis ba pura, kumta hadien ba la dep wad bniah ka Sorkar ka la shim ba ka Tynghor ka dei ka jaka ba biang tam.
U la pynpaw ba ka jingbuh ïa ka Block kam dei ha ki jaka kiba la don lypa ki kynja ophis Sorkar hynrei dei ba bun ha ki jaka ba biang, lada yn buh ha ki jaka ba la don lypa ki ophis Sorkar la dei ban buh ha Aradonga ha kaba bun ki ophis Sorkar ki la don kum ka Police Outpost, ka Bank, ka PHC, Handloom office, veterinary hospital, wholesaler centre, Tourist spot bad kiwei-kiwei, hynrei ka Sorkar ka la peit bniah ban buh ha ki jaka ba long pdeng bad ka la mynjur ban buh ha Tynghor kumba la dawa da kiba bun balang.
