Shillong, Jylliew 16
U Superintendent of Police ka East Khasi Hills District, u Bah Vivek Syiem u la ong ba ki trai arshaka, kidei ban shimkhia bad peit ba ki jaka pynïeng ïa ki arshaka ki long ki jaka kiba shngaiñ.
Ïa kane u Bah Vivek u la pynpaw hadien ka jingjia khah-khah ka jingshah tuh arshaka ha Nongbah Shillong.
Haba kren sha ki lad pathai khubor, u Bah Vivek u la ïathuh ba ka jingshahtuh arshaka ha Nongbah Shillong ka la duna, lada ïa nujor bad kine ki por kiba la leit.
“Ki pulit ki pyrshang ban trei la ka kam, ban kem ïa kito kiba donkti bad dang shen ki la kem ïa ar ngut ki snar tuh arshaka bad ki la ïoh ruh ban kurup noh ïa ki arshaka kiba la shah tuh bad pynphai sha ki trai,” u la ong.
U SP u la kyntu ïa ki paidbah, ba kidei ban husiar bha haba ki pynïeng ïa ki arshaka, namar ka shim por tang 5 minit ïa u nongtuh ban tuh ïa ka bike ne ka scooty kaba ki buh, bad lada kim ujor mar-mar, ka eh ïa ki pulit ban ïoh kurup biang, namar tang hapoh 2 kynta ba ki shah tuh, ki la poi sha khappud bad pynpoi ïa ki sha Bangladesh.
Ki paidbah kidei ban don ïa u Number Phone jong ka Police Station, kaba hajan ban ïoh pyntip mar-mar.
Namarkata, u la kyntu ruh ïa ki paidbah ban pyndait da u kynjri ïa ki arshaka namar lada kin tuh bad pyndkut ïa u kynjri, ki briew kin ïoh sngew na ka jingsawa bad ruh ka jingwiar jong ki ksew.
U la kyntu ruh ban pyndait GPS namar lada ki briew ki tuh kan wan ka jingpyntip sha ki ba la don ba pynkhih ïa ka bike ne ka scooty jong ki ha ka phone, kane kan pynjynjar ïa ki nongtuh bad ka pynsuk ruh ban lap lada ki wad shaei-shaei ïa kine ki ar shaka.
U Bah Vivek u la kyntu ïa ki paidbah ba kin husiar bha bad lada donkam kyrkieh ki lah ban phone ïa u number 112 ne sha ka Police Station kaba marjan, bad kin lah ban pyntip mardor sha ki Police Station kiba pher-bapher namar lada pyntip dier por palat, kan eh ïa ki pulit ban lap ksai ïa ki tiar ba tuh, namar kumba ka paw ïa kine ki tiar mar ïa tuh ki rah bran-bran sha khappud bad sha Bangladesh ban die ïa ki bad na Nongbah Shillong ka shim por tang ar kynta ban poi bad lada pynslem ban ujor kan eh ban lap biang ïa ki.
U la ong ruh ba ka Sorkar lyngba ka SMB, ka la ai ïa ki skhim ban buh CCTV ha ki shnong ki thaw, kane kan long kawei pat ka lad ban pynsuk ïa ki pulit ban lap ïa kiba donkti ban tuh na Nongbah Shillong.
U la khot ïa ka jingïatreilang ba mar kylliang ban tehlakam ïa kine ki kam sniew ha Shillong bad ki shnong ki thaw ba marjan bad ruh ha ka Jylla hi baroh kawei.
