Shillong, Jylliew 16
U Symbud Myntri Rangbah ka Jylla, ba khmih ruh ïa ka tnad District Council Affairs (DCA) Bah Prestone Tynsong u la kyntait ïa ki jingkynnoh jong u Chief Executive Member (CEM) ka Khasi Hills Autonomous District Council (KHADC) ba ka Sorkar Jylla ka bat ïa ka pisa kaba la thmu na ka bynta ki Autonomous District Council, da kaba ong ba baroh ki jingsiew haduh u bnai Lber, 2026 la dep ban siew.
Haba kren halor katei ka jingshah kynnoh, u Bah Prestone u la ong, “Nga tharai ba baroh lai tylli ki District Council ki dei ban sngewnguh ïa kawei ka jingshisha – ba ka Sorkar, teng teng, watla ka rukom ïasam bhah kaba ki don, kam don, hynrei ka don ki khep ba ngi pyllait wat ïa ka, da kaba siew lypa sha ki District Council kiba ïadei kam.”
U la kren kyrpang halor ki jingsiew jong ka KHADC da kaba ong, “Haba phi kren shaphang ka KHADC, ngan ïathuh ïa phi kawei: haduh u bnai Lber, 2026 ngi la pynkhuid lut ïa kiei-kiei baroh shaphang ki jingsiew jong ki, kumta ngam ïohi ba ngi don shuh ki jingsiew kiba dang sah.”
Kumban shu pynkynmaw ba u CEM KHADC kham mynshwa u la kynnoh ba ka Sorkar Jylla ka pynslem ban pyllait pisa sha ka Council.
