Jowai, Nailur 19
Ki pulit ka thanat Jowai ki la ïoh ban kem noh ïa ki 2 ngut ki briew ha ka miet 18 tarik Nailur halor ka jingsuba donkti ha ki kam be-aiñ.
Kine kiba shah kem ki dei u Sdangki Myrphet (35 snem) bad u Wandao Bareh (42 snem) kiba shong ba sah ha Panaliar, Jowai.
Ki pulit ka thanat Jowai kiba dang ïaid pahara ha ka por kumba 7:30 janmiet hajan ka Thomas Jones College ki la ïohi ïa kine ki briew bad suba sniew ïa ka ïaid ka ïeng jong ki.
Kumta ki pulit ki la bat ïa ki bad ha ka jingtohkit la suba jur ba ki donkti ban die ïa ki mar be-aiñ.
Ha ka jingtalasi bniah ïa ki mar ki mata jong ki, la lap ïa u drok ‘heroin’ uba 5.1 ‘gram’ bad ka pisa kaba T. 31,730.
Ki pulit ka thanat Jowai ki la pyndep ïa ki jingdonkam katkum ki kyndon aiñ bad ka jingtohkit ka la ïaid shakhmat.
