Shillong, Nailur 19
Kawei ka longkmie ba la tip kyrteng kum ka Kong Niancy Riahtam ba shong ba sah ha Mawïong Umjapung jong ka dong Tariang A bad i heprit ba la tip kyrteng kum Erika Thabah la lap noh ïa ka met jong ki ha ka Sngi Palei ka 19 tarik Nailur 2024 na ka jingkieng jong ka wah kaba pynïasoh ïa ka NEHU bad ka Mawïong Umjapung ha ka por 1:00 baje mynsngi.
Kine ar ngut ki dei kiba la jah naduh ka 18 tarik mynta u bnai (Nailur) ha ka por ba ki leit sha Mawïongrim.
Hadien ba la lap ïa ka met jong kine ar ngut, na ka liang ki nongkitkam shnong Mawïong Umjapung bad ki pulit na thanat Mawlai ki la poi ha katei ka jaka.
Haba ïoh ban ïakren bad u Secretary Dong jong ka Tariang A, Bah Benedict Nongrum, u la ïathuh ba kine ar ngut ki la jah na ïing naduh ka 18 tarik mynta u bnai ha ka por ba ki leit sha Mawïongrim namar ka Kong Niancy Riahtam ka don ka ïing ba dang shu shna ha ka Dong Lumpyllon ha Mawïongrim bad ka la ïalam kai ïa i heprit Erika Thabah ba dang 5 snem rta.
U Bah Benedict u la ïathuh ba la lap ïa ka metïap jong kine ar ngut da ki khynnah kiba leit sum ha katei ka wah kiba la pyntip pat sha ka shnong ha ka por 12.30 mynsngi.
U la ïathuh ruh ba kum ka shnong kam don kaei-kaei ka jingsuba sniew namar ba kane ka Kong (Nancy) ka dei kaba ieid bha ïa ki khyllung bad ka ju ïalam kai ïa ki bad kam ju don kano-kano ka dak sniew hapoh shnong poh thaw.
Kumta u la ong ba ka shnong ka shaniah ha ka tnad pulit kaei ba kin leh.
