Shillong, Nailur 19
Ka Hynñiewtrep Youths’ Council (HYC) Sengkmie hadien ba wad jingtip lyngba ka Right To Information (RTI) ka la pyntip ba u Director jong ka tnat Housing ka Sorkar Jylla ka la khot ‘tender’ ha ka 11 tarik Rymphang 2022 na ka bynta ban shalan ïa ki tin aluminium ha kaba ka dor jong ka ‘tender’ ka dei T.20 klur.
Ka seng ka la lap ba hadien ba la dep ban peit bniah ïa ki kot ki sla jong ki kompani kiba la thep ‘tender’, ka Departmental Tender Committee ka la jied ïa ka M/S Haryana Iron Works Private Limited kaba la tyrwa ha ka dor T.17,989 shi ban ki tin. Na ka liang ka Department Tender Committee jong ka tnat Housing ka la jied ïa ka M/S Haryana ban ai ïa ka kontrak kaba shongdor haduh arphew klur shi hajar hynñiewspah ar tyngka ha kaba na ka liang u Director jong ka Housing u la ai ïa ka ‘Supply Order’ ha u bnai Lber jong u snem 2022.
Haba ïakren bad ki lad pathai khubor ha ka Sngi Palei, u President ka HYC u la pyntip ba hadien jong kane ha ka 25 tarik Lber 2022 na ka liang ka Department Tender Committee ka la ïoh ïa ka shithi na u Director jong ka tnat Housing ban pyntip ba ka tnat treikam ka la ïoh pisa biang sa kumba T.30 klur ha kaba donkam ban pynkiew biang ïa ka ‘supply order’ da kaba ong ba ha ka jingkhot nyngkong ïa ka ‘tender’ ka long ban shalan ïa ki 11,118 ban ki tin. Hadien ka 25 tarik Lber 2022 na ka liang u Director u la pyntip ba ka Tender Committee ka dei ban pynheh da 14,672 ban ki tin ha ka dor Arphew hynriew klur laiphew khyndai lak laiphew saw hajar hynriewspah phra tyngka. Katba ha ka 4 tarik Ïaïong na ka liang u Director u la ai biang sa kawei ka ‘Supply Order’ ïa kajuh ka kompani kaba haduh T.26,39,34,608 klur khlem da khot ‘tender’ hynrei la ju pynjlan ïa ka por jong ka kompani.
Nalor kane, u Bah Roykupar u la pynpaw kaba lyngngoh ka long ba u Director jong ka Housing u ai ïa ka jingpynjlan treikam sha kane kajuh ka kompani haduh saw sien ha u snem 2022-23 & 24. Katba ha kawei pat ka ‘work order’ kaba la ai ha ka 11 tarik Nailar 2022 na ka liang ka ophis jong u Director ka Housing ka la bteng biang ïa ka ‘work order’ kaba shongdor haduh T.69,64,98,608 klur bad ha u bnai Kyllalyngkot jong u snem 2023 ka seng ka la lap ba hangne ruh khlem shym la khot ‘tender’ thymmai hynrei la lap ba la ai pynban ïa ka ‘work order’ kaba shongdor haduh T.23,22,37,990 klur sha kajuh ka kompani bad nalor kine dang don da kiwei pat ki ‘work order’ kiba u Director jong ka Housing u la ai sha kane ka kompani.
