Shillong, Nailur 19
Ki pulit ki la sdang ïa ka jingtohkit halor ka jingkynnoh dawa pisa jong ka Hynñiewtrep National Liberation Council (HNLC) na ki katto-katne kiba treikam lajong ha kaba la paw ba ki don ar tylli ki jingujor ha kaba ïadei bad kane ka kam dawa pisa.
Ka tyllong khubor ka ïathuh ba ki pulit ki la ïohpdiang 2 tylli ki jingujor bad la sdang ka jingtohkit ban lapksai.
La ong ba kane ka jingdawa pisa ka dei kaba la phah lyngba ka WhatsApp sha kiba shah dawa bad kane ka la paw pyrthei namar ki don ar tylli ki jingujor bad la pynrung ha ka thup ban pynlong ka jingtohkit.
“Kawei ka jingujor ka dei halor ka jingdawa pisa kumba T.15 lak bad kawei pat kaba khlem da buh dor. Kiba shah dawa ki dei ki nongkhaïi trai muluk,” la ïathuh ka tyllong khubor.
Ki pulit man la ka por ki ju kyntu ïa kiba shah dawa pisa ha kino-kino ki kynhun ban ujor bad phah jingtip namar ka long kaba donkam ban ai ka jingïatreilang ban khanglad ïa ki kam runar bad kam beaiñ khamtam ban dawa pisa.
Ki pulit ki la ju buddien ïa ki kam dawa pisa bad pynap shrip ruh ïa kiba donkti ha kum kine ki kam pyntriem bad kam beaiñ kiba pynlong ïa ki nongshong shnong ban im ha ka jingsyier khamtam ban buh jingma ïa ka jingim kiba shah dawa pisa.
