New Delhi, Nailur 20
Kum shi bynta ban kyntiew ïa ka jingïoh ban pynïaid ïew ïa ki mar rep na ki kynhun nongrep trai ri, ha ka 20 tarik u Nailur 2024, la plie paidbah ïa ka Meghalaya Pavilion ha ryngkat ka jingpyllait paidbah ruh ïa ka Meghalaya Collectives kaba la pynlong ha ka World Food India 2024 ha Pragati Maidan ha New Delhi naduh ka 19 tarik Nailur bad pynkut pat ha ka 22 tarik Nailur 2024.
Ha katei ka sngi, kawei ka mat ba kongsan jong kane ka jingïalang ka long ka jingïasoi ïa ka MoU hapdeng ka National Cooperatives of Organic Limited (NCOL) bad ka Meghalaya’s Natural and Organic Farming Society for Livelihood and Innovation in Agriculture (MEGNOLIA), kaba mihkhmat ïa ka Sorkar Meghalaya ban thaw ïa ka jingïatreilang bad kaba pynleit jingmut ha ka jingthied, ka jingpynïaid ïew, bad ka jingdie ïa ki mar bym pyndonkam dawai na Meghalaya kaba la ïasoi hapdeng u Dr Vijay Kumar D, IAS, Commissioner & Secretary ka tnad ka rep ka riang bad ki nongrep ka sorkar Meghalaya, bad u Shri Vipul Mittal Managing Director ka NCOL.
Lyngba ka prokram World Food India 2024, la lum lang ïa ki ‘riew pawkhmat bad ki Myntri na ki jylla bapher-bapher ha ka jingïatylli kaba pynpaw ïa ka mynsiem ïatreilang bad ka jingaiti ban weng ïa ki jingeh ha ka liang ka bam. Kane ka prokram ka thmu ban pynpaw ïa ka jinglah ba shisha jong ka tnad pynmih marbam ha kaba pynkylla ïa ka India kum ka lyngkhot marbam ha ka pyrthei.
Ha katei ka jingïasoi ïa ka MoU, la ïadonlang da u Dr. Ashish Kumar Bhutani, IAS, Secretary bad u ba dei u Myntri ka tnad treilang jong ka Sorkar India ha ryngkat ka jingdon lang u Dr. Vijay Kumar D., IAS, Commissioner & Secretary, ka tnad Agriculture & Farmers’ Welfare kiba la plie paidbah ïa ka Meghalaya Pavilion bad ka jingpyllait paidbah ïa ka Meghalaya Collectives kiba don haduh 21 tylli ki jait mar tynrai.
Hapoh kane ka jingthmu jong ka Meghalaya Collectives, ka Sorkar Meghalaya ka thmu ban ai ka rynsan na ka bynta palat 21 tylli ki mar tynrai kiba la shna napoh ka jylla ba kin suk ban ïoh lyngba ki ïew hapoh ka ri bad shabar ri. Kine ki jait mar ki kynthup ïa ki mar ba la pynkiew dor ba la shna na u sohjew ba pawnam jong ka Lakadong, u sohjew Khasi, u sohjew kew, u sohjew trai ri, u sohjew, bad kiwei kiwei ki mar tynrai.
Kane ka jingïateh ka pynsuk ïa ka MEGNOLIA ban kyntiew ïa ka rep ka riang bad ka jingpynheh ïa ka ïew na ka bynta ki mar rep ba la shna da ki jingthung bym lah ban pyut, ha kaba na ka liang ka NCOL kan pyndonkam ïa ka lad ban pynïaid ïew bad ban pynkiew ïa ka dor jong ki mar.
Na ka liang u Dr Ashish Kumar Bhutani, IAS, Secretary ka tnad treilang jong ka sorkar India u la ong, “Ka jingshem thymmai bad ka jinglong kyrpang jong ki nongrep na Meghalaya ka ju pynhun ïa nga. Nga sngew lyngngoh ïa ka rukom buh bad pynkhreh ïa ki mar rep. Nga thikna ba da ka jingïadei jong ka NCOL, kin sa lah ban rah ïa ki mar sha jngai”.
Na ka liang u Dr Vijay Kumar D, u la ong ba ka jylla Meghalaya ka dei ka Jylla kaba bun ki riewlum, bad ki jaitbynriew ki ïatreilang bad ka kolshor kaba ïatylli kumta, ka long kaba donkam ban wanrah noh da ka kyrteng ban pyni ïa ka kolshor bad ki briew jong ka Jylla Meghalaya.
“Ki don katto-katne ki seng treilang, ki FPO, ki SHG na ka bynta ki kynthei. Kine ki kynhun bapher-bapher ki thaw ïa ka jingbun ki mar. Ngi kwah ba baroh ki kynhun nongrep jong ngi kin don la ki jong ki kyrteng, kiba ka sorkar kan ïatreilang. Kumta, ïa baroh ki mar bapher-bapher yn kyrshan lyngba ka Meghalaya Collectives, ha ka jingïatreilang bad ka NDDB, NCOL, APEDA, bad ka Sorkar India, ban ai ïa ki ïa ka rynsan kaba kham heh shibun”, la bynrap u Kumar.
Katba na ka liang u Vipul Mittal, Managing Director jong ka NCOL, u la ong, “Ngi ngeit skhem ba ngi lah ban ai ka lad ban pynïaid ïew kaba heh bha sha ki nongrep jong ka Meghalaya da kaba pyndonkam ïa kane ka shyieng pynïaid ïew.”
U la ong ba kaba kham sngewtynnad ka long ba ka MEGNOLIA ka dei ka jingthmu, kaba hap hapoh ka tnad ka rep ka riang bad ka bha ka miat jong ki nongrep, kumta da ka jingaiti jong ka sorkar Meghalaya kan pynkylla ïa ka jylla Meghalaya sha ka jaka pdeng jong ka rep ka riang.
“Kane ka ïahap bad ki buit treikam jong ki Sorkar Jylla ban pynkylla ïa ka 100 hajar hektar sha ka jingpynmih organic ha u snem 2028, ha kaba 24 hajar hektar la dep ban pynskhem bad 8 hajar tylli ki dang don ha ka jingpynskhem.
Hadien kane, ka Agricultural and Processed Food Products Export Development Authority (APEDA) ka la pyllait paidbah ruh ïa ka kaiphod jong ka halor ka jingkyntiew ïa ka Agri-export na Meghalaya.
Ki nongïashim ha kane ka jingïathir-ïatai ki kynthup ïa u R M Mishra, Chairperson jong ka Meghalaya State Investment Promotion Board, u Bah Defenderson Shadap, OSD, Directorate of Food Processing, ka Sorkar Meghalaya (Moderator), u Nitin Puri, u nngseng jong ka KisaanSay, u Vipul Mittal, MD, ka Bhumika Malhotra, North Head, Zepto, bad ki nongmihkhmat na ki nongsengkam bad ki Collective jong ka Jylla Meghalaya.
Ha kane ka jingplie paidbah bad plie paidbah la donlang u Dr. U IAS, Executive Chairman, Meghalaya Industrial Development Corporation (MIDC) jong ka Sorkar Jylla, u Abhishek Dev, IAS, Chairman, Agricultural bad Processed Food Products Export Development Authority (APEDA), u Meenesh Shah, Chairman, National Cooperative Dairy Federation of India (NCDFI) bad u Vipul Mittal, Managing Director ka National Cooperative for Organic Limited (NCOL) bad kiwei kiwei ki ophisar na ki tnad ba ïatreilang.
