Shillong, Nailur 20
Ka Congress kaba la mad ïa ka jingduh namar ka jingkyntiap seng jong lai ngut ki MLA kiba la ïasoh sha ka National People’s Party (NPP), ka la mudui sha u Lamphang ka Ïingdorbar Thawaiñ ka Jylla halor ka nongrim ba ki MLA ki la pynkheiñ ïa ki kyndon aiñ bad bnoh ruh ïa ka shithi kaba ki MLA ki la kam ba ki la phah sha u Lamphang ha ka 14 tarik Nailar 2024 ban ithuh ïa ka jingleit ïasoh jong ki bad ka NPP.
Haba kren sha ki lad pathai khubor ha Congress Bhavan ha ka Sngi Thohdieng, u President ka Meghalaya Pradesh Congress Committee (MPCC) u Bah Vincent H Pala u la ong ba ka seng lyngba ka sienjam kaba la shim da ka All India Congress Committee (AICC) ka la phah ar tylli ki jingmudui sha u Lamphang ka Ïingdorbar Thawaiñ u Thomas A Sangma, kawei pyrshah ïa ki ar ngut ki MLA kiba la shah sospon, bad kawei pat pyrshah ïa u Dr. Celestine Lyngdoh uba la iehnoh ïa ka Congress namar kine baroh lai ngut ki dei ban ngat ha ka aiñ mait kyrteng.
U la ong ba kane ka jingmudui kaba la leh da ka AICC, ha kaba ka MPCC ka shu bynrap lang ha ryngkat ki nongsaid aiñ.
Haba kylli, halor ka jingithuh u Lamphang ïa ki lai ngut ki MLA kiba leit ïasoh bad ka NPP bad kaei ka bynta kaba ki MLA ki lah ban shah mait kyrteng namar ka jingleit ïasoh jong ki bad ka NPP, u Joint Secretary ka AICC uba peit ïa ka Meghalaya u Matthew Anthony u la ong ba lada kata ka jingithuh u Lamphang ka dei kaba la shong nongrim balei pat u Lamphang u dang hap pan jingmut biang na u nongsaid aiñ ka Jylla ha kaba ïadei bad ka jingmudui.
U Bah Pala u la ong ba ka bynta ka bym shong nongrim ïa ka jingleit ïasoh NPP jong lai ngut ki MLA ka dei ka jingkam ba ki la phah shithi sha u Lamphang ha ka 14 tarik Nailar 2024, katba ka jingshisha ka long ba uwei na ki MLA u Dr. Celestine Lyngdoh u dang wan ïashimbynta sha ka jingïalang ka MPCC ha ka 16 tarik Nailar 2024 bad ar ngut pat ki MLA u Bah Charles Marngar bad Bah Gabriel Wahlang ki khlem wan sha ka jingïalang.
Kumta haba ki ar ngut ki MLA ki khlem wan shuh sha ka jingïalang, ka seng ka la rai ban sospon noh ïa ki ar ngut ki MLA.
“Haba ki ar ngut ki MLA ki la shah sospon, bad haba u Dr. Celestine u khlem pat rai ban leit ïasoh bad ka NPP da kaba ïashimbynta ha ka jingïalang jong ka Congress ha ka 16 tarik Nailar, kumno kata ka shithi kaba 14 tarik Nailar kaba ki phah sha u Speaker kan shong nongrim. Ka dei kaba la shu leh thok tang ban da rapjot,” la ong u Bah Pala.
U Bah Pala u la ong ba ka seng kan ap ïa ka rai jong u Lamphang kaba un sa pynmih bad lada ka rai kam pynhun, ka seng kan leit mudui sha Ïingbishar bad kane ka jingïakhun kam dei kaba jem hynrei kaba eh bad kaba kham shim por.
Kum ban pynkynmaw, ki lai ngut ki MLA ka Congress ki la leit ïasoh bad ka NPP ha ka 19 tarik Nailar 2024.
