Jowai, Nailur:
Ka Kiang Nangbah Govt. College Jowai, ka la rakhe ïa ka 58th Foundation Day bad plie paidbah ruh ïa ka Integrated Teacher Education Programme (ITEP) kaba la sdang naduh ka 12 tarik Risaw 2023.
Ha kane ka sngi la donlang u Myntri ka tnat pule puthi ka sorkar Jylla u Rakkam A Sangma, u MLA ka Amlarem bad Chief Adviser ka sorkar Jylla Bah Lahkmen Rymbui, u MLA Jowai Bah Wailadmiki Shylla bad u Adviser ka tnat pule puthi Bah HM Shangpliang ha ka jingïalang kaba la long hapoh Auditorium ka kolej ha ka 17 tarik Nailur.
Haba ai khublei ïa ka Kiang Nangbah Govt. College, u Myntri ka tnat Pule Puthi u Rakkam A Sangma u la ai ka jingïaroh ïa kane ka jaka pule halor ka jingnoh synñiang bad ka jingshimkhia ban kyntiew ïa ka pule puthi kaba shajrong sha kane ka thaiñ.
Haba kren halor ka jingkordor jong ka pule puthi, u Rakkam u la ban jur ba ka jingpule kam dei tang ka jinglah ha ka jingpule ne ka jingïoh kam sorkar, hynrei ka dei ka jingpynwan dur ïa ki samla pule ban sngewthuh kham bha ïa ka pyrthei.
U Rakkam haba pynpaw halor ka NEP 2020 u la ong, ka dei ka sienjam kaba don jingthmu, kaba la shna khnang ban pynkhreh ïa ki samla pule na ka bynta ki jingeh jong ka spah snem kaba 21 ne 21st century.
Haba ïadei bad ki nonghikai, u Myntri u la ban jur ba ki nonghikai ki dei ka jingtei ba shisha jong ka imlang sahlang bad ki don ka jingkitkhlieh ban pynroi ïa ki jingmut jingpyrkhat kiba dang samla da ka jingnang jingstad bad ki jinglong babha.
U la ong ba lyngba ka jingplie bad ka jingthmu jong ka Integrated Teacher Education Programme (ITEP) ka long ki khynnah skul kin long kiba la pynkhreh bha.
U Myntri u la ai khublei ïa ka jingpyrshang jong ka sorkar ban pynbha ïa ki jingdonkam ha ki kolej Sorkar bad pynbna ba shen yn sa pyndap ïa ki kam ba lait ha ki jaka pule.
U Myntri u la kren ruh halor ka mat kaba jur bha jong ka jingbun ki khynnah kiba pep skul ha ka jylla da kaba khot ïa ka jingkitkhlieh lang jong ki nonghikai, ki ophisar sorkar bad ka imlang sahlang ha ka ban pynshlur ïa ki khynnah skul ban leit phai biang sha skul, da kaba ban jur ba ka jingpule ka dei u shabi ban weng ïa kiba bun ki jingeh ha ka pyrthei ym tang ha Jylla ne ha India hynrei kylleng ki ri jong ka pyrthei.
Ha kane ka sngi u Rakkam A Sangma ha ka jingdonlang ki MLA bad kiwei kiwei ki ‘riew rangbah u la plie paidbah ïa ka Integrated Teacher Education Programme (ITEP) kaba la sdang naduh ka 12 tarik Risaw, 2023.
Ha kane ka sngi la pynkup burom ruh ïa ar ngut ki samla kiba la ïoh ïa ka kyrdan PhD kiba kynthup ka Dr Sharailyn War Sohlang bad ka Dr Saralyne Kharbhih. Nalorkata, la pynkup burom ruh ïa ki samla kiba wan ha ka kyrdan Topper kiba kynthup ka samla Naina Limbu ha ka Botany bad u Mysonity Thoo ha ka Physics.
