Shillong, Nailur 20
U MP ka Rajya Sabha, u Dr. Wanwei Roy Kharlukhi u la ong ba ka Voice of the Peoples Party (VPP) kan ym lah satia ban jop kput ha ka ilekshon ban wan ha ki ar tylli ki Autonomous District Council, kita ka Khasi Hills Autonomous District Council bad Jaiñtia Hills Autonomous District Council.
Haba kren sha ki nongthoh khubor, une u MP ka NPP sha Rajya Sabha u la ong ba ka ilekshon sha district council ka long kaba pher haba ïanujor bad ka ilekshon MP namar kin don ki kyrtong ha baroh 58 tylli ki constituency jong ki ar tylli ki council.
Katkum ka jingpynpaw jong u Dr Kharlukhi, u la ong, ka jingjied ïa ki kyrtong da ki seng saiñpyrthei ruh kan don ka bynta kaba kongsan bha ha ka ilekshon sha ki district council. “Hynrei ngim lah pat ban kyntait ïa ka jingshisha ba ka VPP ka la lah ban pynskhem ïalade kum ka seng riewlum kaba khlaiñ,” u la ong.
Shuh shuh katkum ka jingong jong u, ym lah ban len ïa ka jingshisha ba baroh ki seng saiñpyrthei ki la shah pynsaphriang ha ka VPP ha ka ilekshon Lok Sabha. “Haba ngi kren shaphang ka jingpynneh pynsah ha ka saiñ pyrthei kam dei tang ïa ki seng riewlum hynrei ka long kumjuh ruh ïa ki seng heh ne national party”, la jubab u Dr Kharlukhi haba kylli hato ka VPP kan lah ne em ban pynneh pynsah ïalade. U Dr Kharlukhi u la ong shuh shuh ba kam don kano-kano ka jingkular ha ka saiñ pyrthei namar ba ka lah ban kylla ha kano-kano ka por. “Peit ïa ka Congress ka la hiar noh hadien ba ka la duh ïa ka bor ha Delhi. Hynrei kan pynskhem ïa ka kyrdan jong ka lada ka India Alliance kan jop ïa ka Bihar ha u snem 2025 bad ïa ka UP ha u snem 2027. Hynrei lada kam lah te ka la hap ban leit phai biang sha kajuh ka thymmei,” u la ong.
Haba kylli shaphang ka lawei jong ka NPP namar ka jingsdang ban duh jingshaniah na ki nongshong shnong ka rilum Khasi bad Jaiñtia, u la ong ba ka NPP ka don ïa ka ktem jong ka ha rilum Garo bad kan ym shah pynduh ne pynkut satia. Haba kren halor ka jinglong nongïalam ka MPCC jong u Bah Vincent H Pala, u Dr Kharlukhi u la ong ba ka don ka jingkynthoh kaba jur ïa ka jinglong nongïalam u Bah Pala bad ha kajuh ka por u la pynpaw ruh ba ki paidbah ki la klet pat ban kynmaw ba ka Congress ka la jop na Tura Parliamentary hapoh ka jingïalam jong u Bah Pala. Hynrei dei ban sngewthuh pat ba ïa ki kam politik ba hapoh, ki briew kiba kwah ban long nongïalam kin shu biej tang ïa kiei-kiei kiba sniew”, la ong u MP ka Rajya Sabha.
U Bah Kharlukhi u la pynkynmaw ba ki don tang ar ngut ki MLA ha u snem 2013 ha ka por ba u dang long u State President ka NPP hynrei ha u 2018 pat la lah ban ïoh syndon ïa ka bor synshar.
Une u MP ka Rajya Sabha u la ong ba kumba ka long mynta, ka Congress ha Meghalaya ka la hiar bad jah hynrei ym lah pat ban leh klet ne kyntait ïa ka jingsdang kha biang jong ka Congress bad kane ka dei ka jingitynnad jong ka jinglong ka saiñ pyrthei.
