Shillong, Nailur:
Ka jingïalang ïamir jingmut ba shi sngi ba la tip kum ka Himalayan Agro-ecology Initiative [HAI] Meghalaya State Level Stakeholders Consultation la pynlong ha ka 17 tarik mynta u bnai College of Post Graduate Studies of Agricultural Sciences (CAU-Imphal), Umiam, Meghalaya da ka Alliance of Biodiversity International bad CIAT, New Delhi.
Kane ka jingïalang ka la ailad ïa ki nongshim bynta bapher bapher, kynthup ïa ki heh sorkar, ki riew shemphang, ki nongwad bniah, bad ki nongrep ban ïakren bad wad ïa ki lad ki lynti na ka bynta ka roi ka par kaba neh ha ka thaiñ. Ka jingpynïaid kaba jop ïa kane ka jingïalang ka long namar ka jingkyrshan jong ki ri bapher bapher ka pyrthei, ki agency kata ka Himalayan Agroecology Initiative (HAI), ka World Future Council, ka IFOAM organics International, ka IFAD bad ka German Agency for International Cooperation (GIZ).
Ïa ka jingïalang la sdang da ka jingïalang plie paidbah, ryngkat ka jingkren pdiang da u Dr. SV Ngachan, Senior Consultant, Meghalaya bad u kongsan ha kane ka sngi u la long Dr. Anupam Mishra, Vice Chancellor jong ka Central Agricultural University Imphal, uba la ai jingkren bad pynpaw ïa ka jingkordor jong ki lum Himalaya, ki jingeh jong ki bad ki buit pynroi ïa ka Himalaya Agro-ecology ha ka jinglong jong ka thaiñ shatei lam-mihngi jong ka ri India.
Ha kane ka jingïalang la ïadon lang ki riewshemphang ba pawkhmat kiba kynthup ïa Dr. Malavika Dadlani, National Consultant, Alliance Bioversity and CIAT, Kong JC Lyngdoh, Director of Agriculture, ka Sorkar Meghalaya, Kong D Sohtun, Director of Horticulture, ka Sorkar Meghalaya bad Dr. JC Rana, Country Representative, Alliance Bioversity and CIAT, Dr. Dhrupad Choudhury, a freelance researcher bad Dr. Parul Thapa, Technical Advisor, GIZ-India, kiba la ai ruh ïa ki jingkren kiba jylliew bad pynpaw ïa ka jingdonkam jong ka agro-ecology ha kaba pynneh pynsah ïa ki jingthaw ba im jong kane ka thaiñ, ban pynthikna ïa ka jingbiang bam, bad ban kyntiew ïa ki rukom im kiba lah ban neh.
Ka jingïalang ka la ailad ïa ki nongïashim bynta ban wad bniah ïa ki phang ba kyrpang kiba ki sngewtynnad bad ailad ïa ki nongïashim bynta ban ïasam ïa ki jingshem jong ki, ki jingeh, bad ki lad ki lynti kiba lah ban weng kiba ïadei bad ki bynta jong ka jingstad jong ki.
Kane ka jingïalang jong ki nongshim bynta ha ka jylla Meghalaya ka la pynksan ïa ka jingdonkam jong ka agro-ecology ha kaba weng ïa ki jingeh ba ka thaiñ ka ïakynduh, kum ka jingkylla ka suiñbneng, ka jingduh ïa ki jingthaw ba im, bad ka jingbym biang ka bam. Ka jingïalang ka la pynpaw ruh ïa ka jingdonkam jong ka jingïatreilang hapdeng ki tnat sorkar, ki nongwad bniah, ki nongrep, bad kiwei kiwei ki nongshim bynta ban pyntreikam ïa ki rukom rep kiba treikam bha.
Shuh shuh, ki jingïakren ki la pyni ïa ka jinglah jong ka rep kaba neh ban pynbha ïa ka jingim, ban ïada ïa ka mariang, bad ban kyntiew ïa ka jingpynbiang bam ha ka jylla Meghalaya. Nalorkata, ki nongïashim bynta ki la kdew ïa ki bynta ba kongsan bad ki lad ki kabu kiba kongsan kiba ïadei bad ka jingpynroi ïa ka rep ka riang ha ka thaiñ, kaba ai ïa ka jingshemphang kaba kordor ha ka lawei.
Ka jingïalang ka la ai ka lad kaba kordor na ka bynta ban ïasam jingtip, ban ïatreilang, bad ban tei ïa ki jingïatreilang sha ka lawei jong ka rep ka riang kaba kham neh bad kaba lah ban ïakhun na ka bynta ka Meghalaya.
Ha ka jingïalang baroh kawei, ka jingïalang ïamir jingmut jong ki nongïashim bynta ha ka Himalayan Agro Ecology Initiatives Meghalaya ka la long ka jingïalang kaba jop kaba la ïarap shibun ban kyntiew ïa ka jingsngewthuh bad pyntreikam ïa ki rukom treikam ha ka thaiñ. Ki jingshemphang ba la ïoh na kane ka jingïalang ki lah ban ai jingtip ïa ki rai ban saiñ kam, ki jingsdang ban wad bniah, bad ki prokram ai jinghikai ia ki nongrep ban kyntiew ia ka rep ka riang kaba neh bad kaba lah ban ïaleh pyrshah ha ka jylla Meghalaya.
