Shillong, Nailur 20
Ki Nongïalam ka Hynñiewtrep Youths’ Council (HYC) Sengkmie ha ka Sngi Thohdieng ki la mih noh hapdeng ka jingïalang ba la khot da ka Myntri ka tnat ka Koit ka Khiah ka Kong Ampareen Lyngdoh, hadien ka jingai daw bym lah ban pynkynriah ïa ka Oral Sustitution Therapy (OST) na Civil Hospital Shillong.
Katkum ka shithi, na ka Sorkar ba la phah lyngba ka Director of Health Services (MI) ka jylla, la ong ba kan don ka jingïalang ha ka 20 tarik mynta u bnai ha ka por 1 baje mynsngi ha kamra treikam jong ka Myntri ka tnat ka Koit ka Khiah bad ha kaba la khot ban ïadon lang ïa Additional Director ka Health Services & Project Director ka Meghalaya AIDS Control Society, Joint Director ka Health Services (SS) ka Civil Hospital Shillong, Superintendent of Police ka East Khasi Hills, Bah W Dohling na ka DD Prevention Meghalaya AIDS Control Society, Shillong, ïa u Bah Barry Leslie Kharmalki, uba dei u General Secretary ka Meghalaya Users Forum bad ïa u President ka HYC Bah Roykupar Synrem. Hynrei la ïohi ba tang hadien katto-katne minit, ki Nongïalam ka HYC ki la mih noh na ka jingïalang khlem da shong pynkut bad la ong ba ka daw ka long halor ka jingkyntait ban pynkynriah ïa ka OST na Civil Hospital Shillong. Ka OST ka dei ka jaka kaba ki kyrni dih drok ki ju leit ban shim dawai ban pynkhuid ïa u drok na ka met jong ki.
Haba kren sha ki lad pathai khubor, u President ka HYC u Bah Roykupar Synrem u la ong, kane ka jingdawa kaba ka seng ka la buh ka long hadien ba ka la lap bad shem ha ki jingkhynra ba katei ka Centre ka la kylla long pynban ka jaka ïadie ïathied drok bad ka jingpynthut ïa kiwei pat ki nongleit shim dawai ha Civil Hospital.
U Bah Roykupar u la ong, ka jingbym kwah pynkynriah jong ka Sorkar ïa ka OST na Civil Hospital ka long halor ki daw bym don jaka, hynrei ki jaka ki bun jaka, bad dei ba kam don ïa ka mon. “Kumta nangne shakhmat haba ngin buddien biang bad lada ngi dang lap ïa ki kam beaiñ bad kam sniew kiba mih na katei ka jaka, ngin nym ujor ejahar shuh ïa ki nongleh kam sniew, hynrei ngin ujor beit pyrshah ïa ka Forum, Director ka DHS bad wat ïa ka Myntri ba kim sngap ïa kaei kaba ngi kren,” la ong u Bah Roykupar.
U la ong ba ha ka jingïalang mar ïasdang, haba la wanrah ïa ka kaiphod da ka MACS kumba la dep ban bthah da ka Myntri, la ong ba ki la dep ban leit peit ïa ki 3 tylli ki jaka hynrei lap pat ba kim long ne biang ban buh ïa ka OST bad pynpaw ba dei ban buh beit ha Civil Hospital. U la ong, “Nalor kane, kaba la pynlyngngoh ïa ka HYC, ka long ba nalor ba ïa kane ka mat la wanrah da ka HYC ban ïakren ïatai, hynrei ha ka jingïalang la lap ba la don sa da kiwei ki kynhun, kiba kum ka seng kam sngew ïahap satia.”
Ha kane ka jingïalang, la ong ba la aiti ha kane ka Forum ban pynïaid beit ïaid ryntih ïa kane ka OST, bad ba kan shim ïa ka jingkitkhlieh, hynrei kum ka seng ka la pynpaw ba ka Sorkar kam dei ban bret ïa kane ka jingkitkhlieh jong ka, sha kino kino ki seng ne kynhun, lada ym lah ban shim jingkitkhlieh kam don jingmut ban shong jingïalang, bad dei hangne ba kum ki Nongïalam ka seng ki la mih noh na kane ka jingïalang. Une u Nongïalam ka HYC u la ong, kumba ka seng ka la ïeng ba ka OST ba kan ai jingsumar, hynrei la lap ba ka long pynban ka jingthut ïa uba bun balang ba leit shim dawai ha Civil Hospital.
U la ong ba ka Forum kaba la mih khmat ïa ki nongdih drok ha kane ka jylla, lada ka Forum ka lah ban shim jingkitkhlieh, ka dei ban shim jingkitkhlieh ba kam dei shuh ban don ka kam tuh kam thiem nangne shakhmat, namar katkum ki jingtip ba la ïoh ka jingbun ki kam shah tuh dei na ka jingbun jong ki nongdih drok. Kumta lada katei ka Forum ka lah ban shim ïa kane ka jingkitkhlieh, ki lah ban shim ban peit bad pynïaid.
La pyntip ba na ka liang jong ka Forum ki la ong ban buh volunteer ha OST khnang ban khanglad bad ban ym don ne lah ban leh kino-kino ki kam beaiñ, hynrei tip shai ba ka long kaba eh, ka Sorkar ka dei ban shim jingkitkhlieh halor kane, la ong u Bah Roykupar.
Shuh shuh u Bah Roykupar u la ong, “Lada nangne shakhmat lada ngin dang lap ïa kum kine kiei-kiei ngin sa leh ïa kaei kaba dei ban leh. Ka jingkitkhlieh halor kane ka dei ban shim da ka Sorkar bad ka Forum bad lada kim lah bad dang bteng ki kam beaiñ ha kane ka Centre, ka HYC kan ym ujor ejahar shuh ïa ki nongleh hynrei kan ujor pyrshah ïa ka Forum, Director bad wat ïa ka Myntri ka tnat ka koit ka khiah.”
