Shillong, Nailur 20
Ki pulit ha ka miet Sngi Palei ki la ïoh ban kem noh ïa uwei u dkhot ba la dep ban pyndem wait jong ka Hynñiewtrep National Liberation Council (HNLC) halor ka jingkynnoh ba u la donkti ban dawa bad lum pisa na ki nongkhaïi bad ki heh spah.
Katkum ka khubor la ong ba ki pulit ka Ri Bhoi, ha ka jingkhynra lang bad ki pulit ka East Khasi Hills ki la ïoh ban kem noh ïa utei u dkhot ba la pyndem wait ka HNLC na ka ïingsah jong u kaba don ha Umpling Dongsharum bad kaba hap hapoh ka jingkhmih jong ka thanat Rynjah.
Utei u dkhot ka HNLC uba la wan pyndem wait ïalade u dei ba la tip kyrteng kum u Sromwell Mawdoh, 41 snem ka rta. Ki pulit ki la kem ïa u Mawdoh halor ka jingkynnoh ba u donkti ban dawa pisa ha ka kyrteng jong ka HNLC.
La ong ba u Sromwell Mawdoh u dei uba la treikam kum u ‘Over Ground Worker (OWG) bad kynnoh ba u donkti ha ka jingleit lum ïa ka pisa ba la phah shithi dawa da ka HNLC.
Katkum ka jingïathuh jong ki pulit, la kem ïa u Mawdoh, bad la pynngat mukotduma halor ka jingkynnoh ba u la dawa pisa kumba la bthah da ka HNLC na katto-katne ngut ki nongkhaïi bad ki ‘riew paidbah ha kylleng ka nongbah Shillong. Ka jingtohkit mynta ka dang ïaid shakhmat ban lap ïa ki jingshisha baroh.
