Shillong, Nailur 20
Ka shlem jong u Superintendent of Police (Traffic) ka East Khasi Hills District ka la pyntip sha baroh ki trai jong ki taksi kamai bad ki Auto Rickshaw kiba don ha East Khasi Hills District ba kan sa sam ‘sticker’ ryngkat ki nombor ba la bha ha ka dor T.150 kawei.
Kine ki ‘sticker’ ban sam kin long sha baroh ki taksi kamai bad ki auto rickshaw kiba kamai hapoh u pud u sam jong ka East Khasi Hills District. Kane ka jingsam kan long naduh ka 22 tarik u Risaw haduh ka 17 tarik u Nohprah, 2024. Kiba wan shim hadien kata kan don ka jingshim tam T.500 na ki trai, ki nongñiah jong ki taksi kamai bad auto rickshaw.
La kyrpad ïa ki trai bad ki nongñiah ban wanrah ïa ki kot ki sla kiba donkam bad kiba biang khnang ba kin lah ban ïoh ïa ka ‘sticker’ bad ki kot ba donkam ki long ka Registration Certificate, ka Permit, ka Insurance Certificate, ka Fitness Certificate, ka Trading License na ka bynta ki trai kali kiba dei ki bar jylla, ka Professional Tax, ka Passenger Tax, ka MLMTU Certificate, ka Pollution Certificate ryngkat ka kopi jong ka EPIC, Aadhar lane kiwei kum ka jingpynshisha.
Hadien ba la dep ban peit bniah ïa baroh ki kot ki sla bad lada lap ba ki biang lut, yn sa ai ïa ki ‘sticker’ bad ïa kiba dei ban tah ha ka liang ka diang jong ka ïit ba nakhmat jong ki taksi kamai bad autorickshaw.
