Shillong, Nailur 20
U nongïalam ka Congress ha Jylla, u Bah Vincent H Pala u la ong ba u sngew ïahap ïa ka jingdawa jong u nongïalam ka TMC u Dr. Mukul Sangma ban don ka jingtohkit halor ki kam beaiñ jong ka Sorkar naduh u dewïong bad kiwei-kiwei bad ka jingtohkit ka dei ban long la kumno-kumno na ka bynta 10 snem.
U Bah Pala u la ong ba bun ki kam beaiñ kiba la leh da ka Sorkar kiba donkam ban don ka jingtohkit bad u la ong ba u sngew dei ïa ka jingdawa jong u Dr. Mukul ban don ka jingtohkit kaba laitluid.
“Nga ïahap bad kaei kaba u Dr. Mukul u la pynpaw bad donkam la kumno-kumno ban tohkit ïa ki kam beaiñ ka Sorkar ha kine ki 10 snem,” u la ong.
Haba kylli halor ka jingkynnoh jong u ba ka NPP ka pyndonkam da ka pisa kaba ïohlum na ki kam beaiñ kynthup na u drok ha kane ka Jylla ban thied ïa ki MLA, u Bah Pala u la ong ba ka jingjyllei ki kam beaiñ ka la paw shynna bad ha kine ki 10 snem ka la jyllei la ka dei ka kam beaiñ halor u dewïong ne u drok.
“Lada ka HYC ka lah ban ïoh kem ïa kiba die drok bad dih drok, balei ka Sorkar kam lah?” la ong u Bah Pala uba la batai ruh ïa ka jingïathuh jong uwei na ki nongsumar ïa kiba kyrni ha u drok, ha kaba u la ong ba na man ki lai ngut kiba la heh la san ha kane ka Jylla, uwei na ki lai ngut un dei beit uba kyrni ha u drok.Kumta u la ong ba kane ka long ka jingma lada ka Sorkar kam shimkhia ban leh ei-ei ïa kine ki kam beaiñ ha kane ka Jylla.
