Shillong, Nailur 22
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem, u la ïathuh ba ka Sorkar Pdeng kan wanrah hapoh ka Dorbar Tlang jong ka Parlia-ment ïa ka 125th Consti -tutional Amendment ka ban kynthup ïa ka jingpynkylla noh ïa ki kyndon jong ka Khyrnit Hynriew jong ka riti synshar ka ri.
U Bah Pynïaid uba dei ruh u Convener jong 10 tylli ki Autonomous District Council jong ka thaiñ shatei lam-mihngi, u la ong ba kane ka jingthmu ban wanrah ïa ka 125th Constitutional Amendment ha Parliament, ka la long hadien ka jingïoh ïakynduh ïa u AK Mishra uba long u Adviser jong ka Ministry of Home Affairs, Government of India, NE Region ha Delhi. Ha kane ka jingïakynduh ïa u Mishra, ïa u CEM la synran lang da u Chairman ka KHADC Bah Lamphrang Blah, u EM Bah Fantin J Lakadong.
U Bah Pynïaid u la ong, “Ngi la ïoh ban ïakynduh ïa u AK Mishra uba dei u nongaibuit jong ka Ministry of Home Affairs ha ka Sngi Saitjaiñ, ha kaba ngi la ïoh ban ïathir ïatai bha ha kaba ïadei bad ka jingdawa ka jong ngi lyngba ka jingtyrwa kaba ngi la phah da ka dorkhas ha ka 25 tarik u Naitung ha u Myntri ka tnat Kam Pohïing ka Sorkar Pdeng u Amit Shah ha Delhi. Ngi la ïoh ban ïatai bha bad u Mishra uba la sngewthuh bha ïa kaei ka jingthmu bad ka jingkwah ka jong ngi ha kaba ïadei bad ka jingthmu ban pynkylla ïa ka 125th Constitutional Amendment.”
“Ha ka jingïakynduh ïa u AK Mishra, ngi sngewthuh shai ba ka sorkar India kan rah ïa ka 125th Constitutional Amendment hapoh Parliament kaban kynthup ruh ïa ka jingpynkylla ïa ki kyndon jong ka Khyrnit Hynriew jong ka riti synshar ka ri ha u bnai Nohprah mynta u snem,” la ong u Bah Pynïaid.
Ha kaba ïadei bad kane, u CEM ka KHADC u la ai khublei kyrpang ïa ka Ministry of Home Affairs kaba la sngap ïa ki jingai jingmut jong baroh 10 tylli ki District Council bad ha kane ka taïew, u AK Mishra u la dep ruh ban ïakynduh la ka jong ka jong ïa ki nongmihkhmat na ki Council jong ka Tripura, Bodo bad ka KHADC bad u khmih lynti ba kane ka jingïakynduh kan long kaba seisoh.
Ha kane ka jingïakynduh na ka liang jong ki ADC kila kren shai ba kin nym lah ban ïa peiñ bad ki riti dustur, ka kolshor, ka synshar ka khaddar, haba ïadei bad kane ka jingpynkylla ïa ka Khyrnit Hynriew bad kane kam dei ban ktah ne pynkylla ïa ka jinglong kyrpang kum ka jaidbynriew.
“Ngi la kren shai ba ngin nym lah ban ïapeiñ bad ka nongrim kaba ngi la tyrwa bad ïa ka jinglong jingman kaba kyrpang ka jong ngi, ki riti ki dustur, tynrai bad ki jingleh tynrai kin neh kumba ju long naduh ka synshar-khadar haduh kiba bun ki bynta ha kaba ïadei bad katei ka jingpynkylla. Ngi kwah ba ka jingpynkylla kam dei pat ban pynduh noh ïa ka jingthmu jong ka jinglong kyrpang ka jong ngi kum ka jaidbynriew,” la ong u Bah Pynïaid bad bynrap ba na ka liang jong u Mishra u la pyntip ba ka Sorkar Pdeng kan ïaleh ban wanrah ïa kata ka jingkylla kaba long kyrpang ha kiba bun ki kolshor bad ki riewlum ha ka thaiñ shatei lam-mihngi jong ka ri khamtam kiba don hapoh jong ka Khyrnit Hynriew
