Shillong, Nailur 22
Kawei ka briew ba kyrteng ka Kong Meltralis Khyllait ka la ujor ejahar ba ha ka 18 tarik Nailur ha ka por kumba 7 baje mynmiet, ki runar ki bym ithuh satia ki la tuh ïa ka kali jong ka (ML-05 AC-2913) najan ïingsah jong ka ha 3 Mer, Upper Shillong.
Uwei u briew ba kyrteng u Narayan Chettri u la ujor ejahar ba ha ka step 17 tarik mynta u bnai, ki runar ki bym ithuh satia ki la prong ïa ka ïingsah jong u ha Oakland, Bivar Road, Shillong bad tuh ïa 2 jur ki soh-shkor ksiar bad 6 tylli ki tiar ba la shna da ka rnong.
Uwei u briew ba kyrteng u Hazel R. Marak u la ujor ejahar ba ha ka 17 tarik mynta u bnai ha ka por kumba 1 baje mynsngi, ka thuk-thuk jong u (ML-05 AA-0419) ka la jah najan ïingsah jong u ha Lawsohtun Block-IV, Shillong.
Uwei u briew ba kyrteng u Bah K. Dikylsing Phawa u la ujor ejahar ba ha ka 16 tarik Nailur, ki runar ki bym ithuh satia ki la prong ïa ka ïingsah jong u (kaba dang shna) ha New Upper Colony, Laitumkhrah, Shillong bad tuh noh ïa ki tiar ba pyndait kamra sum bad pynjulor ruh ïa ki ‘pipe’ PVC kiba shong dor kumba T.80,000/-.
Uwei u briew ba kyrteng u Bah Plostarding Marweiñ u la ujor ejahar ba ha ka 15 tarik Nailur, ki runar ki bym ithuh satia ki la tuh ïa ka thuk-thuk jong u (AS-01BK-9034) na Lailad, Umtap Ïewnongma (WKH).
Uwei u briew ba kyrteng u Bah Akos Lyngdoh u la ujor ejahar ba ha ka 16 tarik mynta u bnai ha ka por kumba 6 baje janmiet, u la lap ba ki runar ki bym ithuh saita ki la tuh ïa ka pisa T. 1.82 lak na ïingsah jong u ha Markham (EWKH).
Uwei u briew ba kyrteng u Bah D. Emjingmut Pariat u la ujor ejahar ba ha ka 16 tarik u Nailur, ki runar ki bym ithuh satia ki la tuh ïa 2 tylli ki Remote Radio Units (RRU) kiba shong dor T. 2.49 lak na ATC (tower site) ha Moopyllaitsyiar (WJH).
