Shillong, Nailur:
Ha ka sienjam ba kongsan ban pynkhlaiñ ïa ka jingshngaiñ ba jrong samoi ha ki kam pisa pilain bad kyntiew ïa ki jingmlien ban sdang kham kloi ïa ka jingkynshew pisa, ka Myntri ba dei khmih ïa ka tnat Kam Pla Tyngka ka Sorkar Kmie, ka Nirmala Sitharaman ka la plie paidbah ïa ka skhim National Pension System Vatsalya (NPS Vatsalya).
La pynbna ha ka Mang Tyngka 2024-25 ha ka 23 tarik Naitung 2024, la saiñdur ïa kane ka skhim baibam tymmen tang na ka bynta ki heprit, kaba long ka jingkiew shaphrang ha ka jingpynkhreh ha ki kam pisa bad ka jingbuh ïa ka jinglong jingman kaba thymmai na ka bynta ka jingsngewthuh ïa ka jingpynkhreh ïa ki kam pisa naduh ba dang rit ka rta.
Ïa kane ka skhim kynshew pisa bad baibam tymmen, la khmih da ka Pension Fund Regulatory Authority of India (PFRDA), ka long ka jingkiew shaphang ki sienjam jong ka sorkar ban pynïar ïa ka jingpynkhreh ïa ki kam pisa bad ruh ka jingshngaiñ ha ki pateng bapher bapher. Da kaba phaikhmat sha ka jingai ka bynta ba ryntih ïa ki pateng bapher bapher, ka NPS Vatsalya ym tangba ka thmu ban ïada ïa ka lawei jong ki heprit hynrei ka kdew ruh ïa ka jingdonkam ban don ka jingmlien ban kynshew pisa naduh ka rta ba dang khynnah.
Hapoh ka skhim NPS Vatsalya, ki kmie ki kpa ki lah ban bei tyngka T.1000 shi bnai ha kaba ym don pud katno lah ban kynshew, da kaba pynshlur ban kynshew pisa na ka bynta ki khun jong ki. La saiñdur ïa ka skhim ban khmih da ki kmie ki kpa tad haduh ban da dap 18 snem i khun, ha kaba ka account ka kylla noh sha ka kyrteng jong ki khun. Ynda ki la heh la san, ïa ka account lah ban pynkylla sha ka NPS account lane kawei pat ka skhim bym dei ka NPS. Lyngba ka jingkular ïa ka jinglang ka spah lyngba ka sut, ka NPS Vatsalya ka thmu ban pynbiang ka lawei kaba don burom bad kaba shngaiñ ha ka pisa pilain na bynta kito kiba thep pisa, kaba ïahap bad ka jingkut jingmut jong ka Sorkar na ka bynta ka bha ka miat ha ki kam pisa.
Ka jingplie ïa ka Account bad ka jingpynïaid ïa ka: Hapoh ka skhim NPS Vatsalya, baroh ki khynnah haduh 18 snem ka rta ki lah ban plie account. Ïa ka account lah ban plie ha ka kyrteng jong i khynnah bad pynïaid da ki nongsumar jong ki haduh ynda rangbah ki khynnah, kaba pynthikna ba i khynnah i long i nongïoh jingmyntoi marwei ha kane ka kam baroh.
Lah ban plie ïa ka account lyngba ki Points of Presence (PoP) bad ka Pension Fund Regulatory and Development Authority (PFRDA). Kine ki PoP ki kynthup ki bank ba heh, India Post, bad ki pension fund, ha ka rukom online bad kaba leit hi dalade ban plie account. Na ka bynta kito kiba jied ïa ka online, ka rynsan eNPS jong ka NPS Trust ka pynbiang ïa ka rukom kaba suk bad kaba shngaiñ ban plie ïa ka account. Lah ban ïoh ïa ka thup ba pura jong ki PoP ba la rejister ha ka website PFRDA.
Ki kot ki sla ba donkam: Ban plie ïa ka NPS Vatsalya account, ki kot ki sla kiba donkam ki long ka jingpynshisha ïa ka tarik kha na ka bynta ki heprit: Na ka bynta kane donkam ïa ka Syrnot sngi kha, ka School Leaving Certificate, Matriculation Certificate, PAN, lane Passport.
Ka KYC jong u Nongsumar: U nongsumar u dei ban ai ka jingpynshisha na ka bynta lade bad ka jaka sah, ba kynthup ïa ka Aadhaar, Driving License, Passport, Voter ID card, NREGA Job Card, lane ki kot ki sla ba ïadei bad ka National Population Register.
Ka Permanent Account Number (PAN) jong u Nongsumar lane ka Form 60 declaration, katkum ka Rule 114B. Ka NRE/NRO Bank Account (marwei lane ïasohlang) jong i heprit, lada jia ba u nongsumar u dei u NRI (Non-Resident Indian) lane OCI (Overseas Citizen of India).
Ka jingkylla haba la long rangbah (18 snem ka rta): Ynda i khynnah i la kot 18 snem ka rta, ka NPS Vatsalya account ka kylla sha ka NPS Tier-I (All Citizen) model. Kum shi bynta kane ka kam, dep ban pyndep ïa ka KYC ba thymmai hapoh lai bnai naduh ka tarik ba dap 18 snem. Shisien ba ka account ka la kylla, ki bynta, ki jingmyntoi, bad lad ban mih noh kiba don hapoh ka NPS Tier-I All Citizen Model kan sdang treikam, kaba wanrah ïa ka jingbteng jong ka jingshngaiñ bad ki lad bei tyngka ïa ki briew.
Ka skhim National Pension System Vatsalya (NPS Vatsalya) ka dei ka sienjam ba kongsan ban kyntiew ïa ka jingshngaiñ ha ki kam pisa pilain bad kyntiew ïa ka rukom ban kynshew pisa naduh ka rta ba dang khynnah. Da ka jingwanrah ïa ka skhim baibam tymmen ba kyrpang na ka bynta ki heprit, ka sorkar ka thmu ban pynthikna ba ki khynnah ki don ïa ka jingmlien ban kynshew pisa bad ïoh jingmyntoi na ka pisa ba la lang la slem lyngba ka jinglang ka spah namar ka sut.
Kane ka sienjam ka pyni ïa ka jingkut jingmut jong ka sorkar ban pynïar ïa ka jingpynkhreh ïa ki kam pisa bad pynthikna ka lawei ba don burom ïa baroh ki nongshong shnong, kaba la wanrah ïa ka bha ka miat ha ki kam pisa na ka bynta ki pateng bapher bapher.
