Shillong, Nailur 22
U nongïalam ka Liang Pyrshah, Dr. Mukul Sangma, u la buh jingkylli ïa ka Sorkar MDA halor ka jingtuid kyndit ki kam pynroi ha Gambegre konstitwensi bad u la ong ba kane ka jingleit kular kam pynroi ki Myntri Sorkar ha kane ka konstitwensi ka paw la kumba kiwei ki jaka ki la biang lut bad kim donkam kam pynroi.
U Dr. Mukul u la buh ïa kane ka jingkylli hadien ba ka Sorkar MDA ha ryngkat katto-katne ngut ki Myntri Sorkar ki la sdang ban pynbeit jingmut ban leit kular kam pynroi ha Gambegre konstitwensi.
U Dr. Mukul u la kren ïa kane ha kaba ïadei bad ka jingpyndonkam ka Sorkar da ki lad ki lynti kumno ban theh kam pynroi ha kaba ka jia ryngkat namar ka Gambegre konstitwensi kan leit sha ka ilekshon MLA shiteng samoi.
U la ong ba ki kam pynroi ki donkam bad hap ban long ïabiang lang ha kiwei ruh ki konstitwensi.
“Peit ïa ka jinglong jingman ki surok ha kylleng ka Jylla ha kaba bun ki surok ki la sniew bad ka Sorkar kam pat lah ban leh ei ei la ka dei ban maramot lane ban siang rong thymmai. Hynrei ka don ka jingkular ïa ki kam pynroi kum ka jingpynbha surok ne shna surok ha Gambegre la kumno kiwei pat ki jaka kim donkam pynroi,” la kynthoh u Dr Mukul.
U la ong ruh ba ki don ki Myntri Sorkar kiba la leit khnang sha Gambegre ban kular kam pynroi kaba paw shai tang na ka bynta ka ilekshon MLA shiteng samoi ka ban sa long ha Gambegre konstitwensi, hynrei lada phai sha kiwei pat ki thaiñ bad ki jaka, ki dei ruh kiba donkam lang ban ïoh ïa ki kam pynroi.
Haba kren shaphang ka jingsniew ki surok bad ka jingdonkam ban maramot ne siang rong thymmai, u Dr. Mukul u la ong ki don ruh ki kontraktor kiba pyntrei ïa ki surok kiba slem ban ïoh pisa namar ka Sorkar ka aidaw ba kam pat lah ban pyllait pisa na ka bynta ki projek kiba la pyntrei, hynrei ki don pat ki kontraktor kiba ïoh beit ïa ka pisa (bill) katba kiwei pat kim ïoh satia.
“Nga ïohsngew ba don kum kita ki kontraktor ha Shillong kiba ïoh beit ïa ka bill, bad ngin sa wad mano kita kiba ïoh pisa beit katba kiwei pat ki syllang ban ïoh,” la ong u Dr. Mukul.
