Shillong, Nailur 22
Hadien ka jingdon da ki spah tylli ki skul kiba don khynnah skul tang hapoh 10 ngut, ka Sorkar ka la lap ba ki don 164 tylli ki skul ha Meghalaya ki bym don khynnah skul syndon.
Ka Sorkar ka la lap ïa kane hadien ka jingkhmih ïa ka jingdon ki skul kiba bun jait bun rukom ha kane ka Jylla khamtam ka jingbun palat ki skul ha kane ka Jylla.
Katkum ka jinglap bad jingai jingkheiñ, la pyni ba kine ki skul ki bym don khynnah skul satia ki don haduh 164 tylli, ha kaba 100 tylli ki dei ki skul shimet ki bym don khynnah, katba 64 tylli ki dei ki skul kiba kyrshan lang ka Sorkar kynthup ïa ki skul Sorkar 33 tylli, ki skul SSA 18 tylli bad ki skul ba shu kyrshan (grant in aid) ki don 13 tylli.
Lait noh ki 100 tylli ki skul shimet, ki 64 tylli ki skul kiba donbynta lang ka Sorkar, ki la long ka jingpynsep-ei ïa ka pisa naduh ka jingbei ban siew tulop bad kiwei kiwei ki jingdonkam.
Ka jingkylli kaba kham kongsan ka long, katno ngut ki nonghikai kiba shim tang ka tulop mynta la katno snem shuh haba ki hikai ha kine ki skul ki bym don khynnah?
La ong ba kine ki skul ki bym don khynnah skul ki dei kiba la don mynta la bun phew snem khlem kano-kano ka jingleh ei-ei ïa ki ha ki phew snem kiba la leit.
Ka Sorkar mynta kan leh ei-ei hadien ba la lap ïa kum kine ki skul kiba long ka jingduh jingkyrmen ïa ka pule-puthi.
Katkum ka jingai jingkheiñ ha man la ki district la ong ba ha West Garo Hills district ki don 46 tylli ki skul; 5 tylli ki skul Sorkar, 4 tylli ki skul SSA, 5 tylli govt aided bad 32 tylli ki skul shimet.
Ha East Garo Hills district baroh 6 tylli ki dei ki skul Sorkar ki bym don khynnah skul.
Ha South Garo Hills district, na ki 20 tylli, 18 tylli ki dei ki skul Sorkar, 1 skul SSA bad 1 skul shimet.
Ha West Khasi Hills baroh 15 tylli ki skul ki bym don khynnah bad ki 4 tylli ki skul ha Ri Bhoi ki bym don khynnah ki dei ki skul shimet.
Ha East Khasi Hills district, na ki 9 tylli ki skul, 7 tylli ki skul shimet, 1 skul Sorkar bad 1 skul SSA.
Ha West Jaiñtia Hills district ruh, na ki 10 tylli, 1 skul Sorkar, 4 tylli skul SSA, 3 tylli govt aided bad 2 skul shimet.
Ha North Garo Hills district, ki don 4 tylli ki skul kynthup 3 tylli skul SSA bad 1 govt aided.
Ha East Jaiñtia Hills ki don 3 tylli ha kaba 2 tylli ki skul Sorkar bad 1 skul shimet.
Ha South West Khasi Hills na ki 32 tylli ki skul, 29 tylli ki skul shimet, 2 tylli skul SSA, bad 1 govt aided skul.
Shuh shuh ha South West Garo Hills, na ki 6 tylli ki skul, 2 tylli ki skul SSA, 1 govt aided bad 3 tylli skul shimet.
Nangta, ha Eastern West Khasi Hills district, ki 9 tylli ki skul bym don khynnah ki kynthup 6 tylli ki skul shimet, 1 skul SSA, bad 2 tylli skul govt aided.
