Nongstoiñ, Nailur 22
Ki 21 tylli shnong na 3 tylli ki Polling Station kiba la shah pynhap mynta hapoh ka Rambrai Jyrngam Konstitwensi, ki la byrngem ban leit tur sha shlem treikam jong ka Khasi Hills Autonomous District Council (KHADC) ban dawa pynneh beit ha ka konstitwensi kaba ki la don naduh mynshwa.
Kane ka jingbyrngem jong kitei 21 tylli ki shnong ka la long namar ka jingsngap mynthi jong ka Khasi Hills Autonomous District Council (KHADC) bad ka Select Committee halor ka jingpynhap ïa ki lai tylli ki Polling Station ba kynthup ïa ka Misei, Mawsmai bad ka Langdongdai sha ka Rambrai Konstitwensi na ka bynta ka ilekshon MDC ka ban wan.
Kane ka jingshah pynhap jong kitei 21 tylli ki shnong sha Rambrai konstitwensi, ka la pynlong biang ïa ka JAC jong kine lai tylli ki polling station ba kin nang pynjur ïa ki jingïakhih ban pynpaw ïa ka jingpyrshah.
Kane ka la paw ruh ha ka Sngi Saitjaiñ jong ka taïew ha kaba ka JAC Ki Lai Polling Station (Misei, Mawsmai bad Langdongdai) ki la pynlong biang ïa ka jingïalang paidbah ha ka shnong Nongmisei ha West Khasi Hills ban pynpaw ïa ka jingpyrshah na ka bynta ka jingpynhap jubor ïa ki 21 tylli shnong sha Rambrai Jyrngam Konstitwensi na Mawshynrut Konstitwensi na ka bynta ka ilekshon MDC ban wan.
Shuh shuh ka sur na ki 21 tylli shnong ba hap ha ki 3 tylli ki Polling Station, ka ïeng ban pyrshah jur bad lada ka KHADC kam pynneh ha Mawshynrut Konstitwensi nangne shakhmat ki paidbah hapoh ka jingïalam ka JAC kin sa nang pynjur shuh shuh ïa ka jingïakhih.
Ha katei ka sngi, la ong ba kiba bun ki nongkren ki la pyngsngew ïa ka jingpyrshah ïa ka jingpynhap jubor da ka Select Committee khlem da sngap ïa ka sur jong ki paidbah. Ha ka jingïashim bynta haba jingai jingkren, ki seng na ka thaiñ ki la buh ïa u dak jingkylli ïa ki MDC bad MLA ka thaiñ, hato don aïu shalyndet jong ka jingsngap man-man jong ki halor kane ka jingdawa ba shongnia jong ki paidbah na 21 tylli ki shnong?.
Ki paidbah lyngba kane ka jingïalang, ki la pynpaw ïa ka jingsngewdiaw bad jingsngewsih shikatdei eh halor ka jingeh dohnud ka KHADC ban ai rai ban pynneh ïa lai tylli ki Polling Station kiba don 21 tylli ki shnong lyngba ka Select Committee wat hadien ki Nongïalam ka JAC ki la pynher da ki jingthoh arsien arwat bad leit ïakynduh ruh markhmat ïa u Chairman ka Select Committee u Bah PN Syiem.
Nangta, ha katei ka sngi la ong ba ka sur ki seng ha ka jingai jingkren ki la kren shai ba kin kyrshan ïa ki 21 tylli ki shnong ban neh beit ha Mawshynrut Konstitwensi ym ban pynkynriah sha Rambrai Jyrngam.
Shuh shuh ha katei ka sngi, ka sur jong ki 21 tylli ki shnong, ka la pynpaw ïa ka kyrwoh kaba shai sha u Bah PN Syiem bad ka Select Committee ba lada kim sngap ïa kane ka jingdawa, ki paidbah na ki 21 tylli ki shnong ki la rai ban leit tur paidbah shaduh sha KHADC ha Shillong bad lada jia eiei, ka KHADC bad ka Select Committee kan shim ïa ka jingkitkhlieh.
