
Shillong, Nailur 22
U Bah Daniel Wahlang uba dei uwei u nongkyrshan ba hakhmat jong ka UDP Mawsynram Circle uba la don bynta ban pynjop ïa u MLA ba mynta Bah Olan Sing Suin ha u snem 2023 u la dep phah da ka jingthoh sha u MLA bad sha ka Executive Committee ka UDP ba u kwah ban ïakhun ïa ka ilekshon MDC na Mawsynram na ka tiket UDP.
Haba ïoh ban ïakren bad u Bah Daniel lyngba ka ‘phone’ u la pyntip ba ïa kane ka shithi u la dep phah ha kine ki lai bnai hynrei haduh mynta um pat ïoh jubab eiei.
U la ïathuh ba haduh mynta ym pat don ki nongkitkam ka UDP ban phah da ka jingthoh hynrei dei tang ma u, uba la mih shakhmat ban pan tiket.
Katkum ki khubor ba la ïoh lum ba u MLA ka Mawsynram u Bah Olan un ym ïakhun ïa kane ka ilekshon MDC hynrei un ailad ïa ki nongkitkam ba kin pan ïa ka tiket. Pynban ki khubor kiba jan ki la ïathuh ba lada ym don kiba pan tiket u lah ban ïakhun hi ïa kane ka ilekshon.
Ki khubor ki ïathuh ba ki nongkyrshan kiba hakhmat ki kwah ban phah ïakhun hi ïa u Bah Olan hadien ba ka UDP ka la hiar kynsan ka jingïoh vote ha ka ilekshon MP ba dang shu dep.
Ha kine ki sngi la ïohi ba u MLA ka Mawkyrwat ryngkat ki nongkitkam ki la dep pynbna ïa u kyrtong MDC na ka UDP bad kaba sah mynta satang ban ïoh jingmynjur na u President ka UDP Sengkmie.
Katba ha Mawsynram Konstitwensi kaba hap ha East Khasi Hills District ki dang peit bniah ïa ka jinglong jingman ïa kane ka elekshon kaba dang bteng ka jinglong MDC ïa kine kiba rim.