Jowai, Nailur:
Ka Thomas Jones Synod College, Jowai ka la pynkup burom ïa ki 180 ngut samla pule kiba la pyndep ïa ka kyrdan pule Graduate ha ka Bachelor of Arts (BA), Bachelor of Commerce (B.Com) Bachelor of Science (B.SC) bad HSSLC ha ka jingrakhe ïa ka ‘Graduation Day 2024’ ha phyllaw ka kolej ha ka Sngi Thohdieng.
Ïa ka jingïalang pynkup burom la pynïaid da Dr. PMB Rani Assistant Professor, Department of Botony ha ka jingdonlang u kongsan u Rev. KL Giri Member Governing Body Thomas Jones Synod Collage, ki nonghikai bad ki samla pule.
Shwa ka jingpynkup burom la ïoh ka jingkren pdiang na ka Principal ka kolej ka Dr. Ïaraplang Dkhar bad ka jingpule bad duwai na ka Kong M Sutnga.
U Rev. KL Giri ha ka jingkren u la pynpaw ka jingkmen ban ïohsngew ba ka Thomas Jones Synod Collage ka la sei haduh 180 ngut ki samla kiba la pyndep ïa ka jingpule mynta u snem bad u la ai khublei kyrpang ïa ka jingjop ka jong ki.
Ka long kaba shisha bad kaba sngewsih ban ïohi ba bun ki samla kiba la pyndep ïa ka jingpule, ki pheil pat ban im ka jingim kaba don jingmut bad kaba jop. Kumta u Rev. Giri u la kyntu ïa ki samla pule jong kane ka kolej ban im ka jingim kaba bha ba miat bad kiba jop ha ka jingim.
Nalor ki 180 ngut ki samla pule la pynkup burom ruh ïa ki 11 ngut ki Department Topper bad uwei u Collage Topper.
Ha ka Bachelor of Arts (BA) ïa ka nam Department Topper bad Collage Topper la ïoh da u Happystone Syngkon na ka Department of Education uba la wan ha ka kyrdan 7th position ha ka result NEHU.
Na ka English Department la ïoh da ka Trewasara Hadem, na ka Khasi la ïoh da u Quickly Pala, na ka History la ïoh da ka Rosyness Dkhar, na ka Political Science la ïoh da ki ar ngut ka Cherisa Shylla bad ka Remembermi Shylla bad na ka Philosophy Department la ïoh da ka Shabanam Begum.
Ha ka Bachelor of Commerce (B.Com) ïa ka nam Department Topper la ïoh da u Dapyntngen Mi Talang.
Ha ka Bachelor of Science (B.SC) ïa ka nam Department Topper la ïoh da ka Abigail Devian Rymbui Zoology, u Lemiki Bang Chemistry bad ka Sakani Phawa na ka Botony.
Ha ka HSSLC la pynkup burom ïa u Shiningstar Myrphet na ka Arts Stream, u Lewanki Dhar na ka Science Stream bad Sanborlangki Rupsi Commerce Stream.
La pynphuh-pynphieng ïa kane sngi kyrpang jong ki samla pule da ki jingrwai ba la ïa shim bynta da ki samla pule kane ka kolej.
