Mawkyrwat, Nailur 22
Ka National People’s Party (NPP) Mawkyrwat Block Unit ha ka 21 tarik u Nailur, 2024 ka la pynlong ïa ka jingïalang ha Mawkyrwat Dorbar Hall ha ryngkat ka jingdonlang ki nongkyrshan bad ki Nongïalam jong ki Primary Unit bapher-bapher jong ka konstitwensi na ka bynta ban jied ïa u kyrtong u ban sa ïa aireng ha ka MDC ilekshon napoh ka Mawkyrwat konstitwensi.
Ha kane ka jingïalang ki paidbah nongkyrshan ha ryngkat ki Nongïalam ka NPP Mawkyrwat Block Unit da kawei ka sur ki la rai bad mynjur ïa ka kyrteng jong u Bah Carnes Sohshang kum u kyrtong ka NPP napoh ka Mawkyrwat Konstitwensi.
Kane ka jingïalang ka la long kaba ïaid beit ïaid ryntih ha kaba kam shym la don satia kano-kano ka jingthut ne jingkhohñioh na kano-kano ka liang bad baroh ki la mynjur bad ïahun lang ban phah beit tang kawei ka kyrteng jong u Bah Carnes Sohshang sha ki bor bahalor jong ka NPP.
Na ka liang u Bah P Nongsiej, President NPP Mawkyrwat Block Unit hadien ba la wai ka jingïalang u la ïathuh ba na ka liang ki Nongïalam ka Mawkyrwat Block ki la pyndep ïa ka kamram bad kin sa phah ïa ka kaiphod sha ka district bad ki bor bahalor jong ka NPP bad ki ngeit skhem ba ki bor bahalor kin pdiang bad burom ïa ka jingrai u paidbah ka Mawkyrwat konstitwensi.
U Bah Carnes Sohshang haba ai jingkren, u la ai khublei ïa ki paidbah nongkyrshan ka NPP, u la pynpaw ruh ba um don kano-kano ka jingtieng ne jingsyier ban ïaleh ilekshon na ka NPP. “Kumba don ba ong ba u Carnes u leit noh ïap haba u leit pynïasoh bad ka NPP, hynrei nga kren shai ba nga kmen bad nga sngwskhem ban ïaleh ilekshon na ka NPP namar nga rung ban pynkhlaiñ ïa kane ka seng kaba ïalam ïa ka sorkar ban pynim ïa ka dong ka thaiñ ïa ka jingdonkam u paidbah la ka long ha ka roi ka par, ka jingeh ki samla, ki nongrep bad ki lynti ki syngkieñ,” la ong u Bah Carnes.
Ha kane ka sngi la ïadonlang u Bah H.S Diengdoh, Working President ka NPP South West Khasi Hills District, Bah P Nongsiej, President NPP Mawkyrwat Block Unit, Bah Sylvester Syiemlieh, Secretary NPP Block Unit, Bah Enbin Kharaswai MDC barim bad kiwei kiwei ki ‘riew rangbah.
