Shillong, Nailur 22
Ka Sorkar Pdeng ha ka Sngi Saitjaiñ ka la pynbna ïa ka jingthung ïa ki 8 ngut ki Chief Justice sha ki High Court bapher-bapher kynthup ïa ka Meghalaya High Court. Kine ki jingthung ki long hadien ba ka Collegium ka la pynkylla ïa ki katto-katne ki jingai jingmut ba la mynjur ha ka 11 tarik Naitung.
Kitei ki jingthung kam ki long hadien shisngi ba ka ïingbishar jong ka Supreme Court ka la ong ba ka collegium jong ka kam dei ka “komiti wad bniah” bad ka la kyrpad ïa u Attorney General R Venkataramani ban aiti ïa ka kaiphod halor ka jinglong jong ki kyrteng kiba la pynkynmaw biang ban thung kum ki nongbishar hynrei kiba dang hap ban pyndep da ka Sorkar Pdeng.
U Arjun Ram Meghwal, Myntri ka Sorkar Pdeng (Independent Charge) ba dei peit ïa ka tnat aiñ, u la pynbna ïa ki jingthung kam lyngba ka rynsan ‘X’. “Ha kaba pyndonkam ïa ka bor ba la ai da ka Riti Synshar jong ka Ri India, ka President ka la pyntip ïa ka jingthung bad pynkynriah kam ïa ki 8 ngut ki Nongbishar Rangbah jong ki ïingbishar jong ki High Court,” u la thoh.
Ki nongbishar ba la shah thung kum ki Chief Justice jong ki ïingbishar bapher-bapher jong ki jylla ki long u Justice Indra Prasanna Mukerji (u Nongbishar ka Calcutta High Court) u la shah thung kum u Chief Justice jong ka Meghalaya High Court.
Kiwei pat kiba la shah thung ki long u Justice Manmohan (uba dang dei u Acting Chief Justice ba mynta jong ka Delhi High Court) ban shah thung kum u Chief Justice jong ka Delhi High Court. U Justice Rajiv Shakdher (uba dang dei u nongbishar ba mynta jong ka Delhi High Court) u la shah thung kum u Chief Justice jong ka Himachal Pradesh High Court.
U Justice Suresh Kumar Kait (u nongbishar jong ka Delhi High Court) u la shah thung kum u Chief Justice jong ka Madhya Pradesh High Court. U Justice Nitin Madhukar Jamdar (nongbishar jong ka Bombay High Court) u la shah thung kum u Chief Justice jong ka Kerala High Court. U Justice Tashi Rabstan (nongbishar jong ka Jammu and Kashmir bad Ladakh High Court) u la shah thung kum u Chief Justice jong ka Jammu and Kashmir bad Ladakh High Court.
U Justice KR Shriram (nongbishar jong ka Bombay High Court) u la shah thung kum u Chief Justice jong ka Madras High Court. U Justice MS Ramachandra Rao (uba dang bat mynta kum u Chief Justice jong ka Himachal Pradesh High Court) u la shah thung kum u Chief Justice jong ka Jharkhand High Court.
Nalor kata, lai ngut ki Judicial Officers ki la shah thung kum ki Additional Judges jong ka Madras High Court bad kine ki long ka R Poornima, M Jothiraman, bad Dr. Augustine Devadoss Maria Clete.
