Shillong, Nailur:
Wat la ka Congress bad ka TMC ki don ka jingsngewthuh jingmut ha Ïingdorbar Thawaiñ hynrei ha ka ilekshon MLA shiteng samoi ha Gambegre konstitwensi kine ki seng saiñ pyrthei kin ïaid la ka jong bad sei la ki jong ki kyrtong.
Ka Congress ka la ong ba kan sa sei kyrtong bad kin sa don ruh ki kyrtong na kiwei ki seng kum ka NPP, BJP bad TMC.
U President ka Congress, Bah Vincent H Pala u la ong ba ka jingïadonlang ka Congress bad ka TMC ha Ïingdorbar Thawaiñ ka dei halor ki mat kiba kum ka Liang Pyrshah ki hap ban donlang, hynrei kam dei ka jingïatreilang ha ka ilekshon.
Lyngba ka jingkyrshan lang ka Congress bad TMC, u MLA ka TMC, u Dr. Mukul Sangma u la shah thung kum u nongïalam ka Liang Pyrshah katba u MLA ka Congress u Bah Ronnie V Lyngdoh u la shah thung kum u Chief Whip ka Liang Pyrshah.
Ha kawei pat ka liang, ka Congress kam pat batai shai lano kan weng noh na KHADC ban ym ïatreilang shuh bad ka NPP ha ka Executive Committee.
U Bah Pala u la ong ba ka seng ka la dep ïakren ïa kane bad kum ka seng saiñ pyrthei kam leh kyrkieh namar naduh basdang ki MDC ka Congress ki rai ban ïatreilang ha KHADC tang namar ka jingsngewkhia halor ka mat kaba kongsan bha namar ba ka Sorkar Pdeng ka don jingthmu ban pynkylla ïa ki kyndon jong ka Khyrnit Hynriew.
U la ong ba ka Congress ka sngew ba kam dei ban shu ieh ha ka BJP bad ki kynhun jong ka ban leh katba mon ban pynkylla ïa ka Khyrnit Hynriew kaba dei ban ïada ïa ki paid riewlum ha ka Thaiñ Shatei Lam Mihngi.
