Shillong, Nailur 22
Ki MLA ha Meghalaya kin ïoh ban bteng ïa ka samoi treikam jong ki haduh u snem 2029 lada ka jingpynlong ilekshon ha kajuh ka por ha baroh kawei ka ri India kan urlong kumba la dep mynjur da ka Kynhun Myntri ka Sorkar Pdeng.
Ha ka jingshisha, ka samoi treikam kaba san snem jong ki MLA ha Meghalaya ka dei ban kut ha u Lber, 2028. Hynrei lada ka Sorkar Pdeng ka lah ban pynurlong ilekshon ha kajuh ka por ha baroh ki Jylla, ka mut ba ki MLA kin ïoh ban bteng haduh u snem 2029 namar ka samoi treikam jong ki Ïingdorbar Thawaiñ ha kylleng ki Jylla kin kut lang bad ka samoi treikam ka Parliament ha u snem 2029.
Kum ban pynkynmaw, ka Kynhun Myntri ka Sorkar Pdeng hapoh ka jingïalam u Myntri Rangbahduh, u Narendra Modi ka la ai jingmynjur ha ka 18 tarik mynta u Nailur ban pynlong tang kawei ka ilekshon ka ban sa pynlong ha kajuh ka por ïa ka ilekshon MP bad MLA ha baroh kawei ka ri India, lane ka ‘one nation, one election.’
Ïa ka ilekshon ha ka ri baroh kawei yn pynlong ha ki ar tylli ki wat; kita, ka wat banyngkong bad ka wat ba-ar.
Ha ka wat banyngkong, yn pynlong ïa ka ilekshon sha Ïingdorbar Thawaiñ Lok Sabha bad Ïingdorbar Thawaiñ ki Jylla bapher bapher, bad ha ka wat ba-ar, yn pynlong sa ïa ki ilekshon kum ka ilekshon Municipal, Panchayat bad kiwei kiwei ki ilekshon bad dei ban pyndep hapoh 100 sngi hadien ba la pynlong ïa ka ilekshon Lok Sabha bad ilekshon sha ki Ïingdorbar Thawaiñ ha kylleng ki Jylla.
Baroh ki Ïingdorbar Thawaiñ ha ki Jylla kin hap leit lang sha ka ilekshon ynda la kut ka samoi treikam jong ka Parliament ka ban kut ha u snem 2029.
Lada ki don ki Ïingdorbar Thawaiñ ha kino-kino ki Jylla kiba hap ban pynwai noh shiteng por khlem pat kut ka samoi treikam san snem, ïa ka ilekshon kaba thymmai yn pynlong ha kita ki Jylla tang na ka bynta ka samoi treikam kaba dang sah.
Kum ka nuksa, lada don ki Jylla kiba hap pynwai noh ïa ka Ïingdorbar Thawaiñ ynda la ïaid 3 snem ka samoi treikam, yn pynlong ilekshon thymmai biang na ka bynta ka samoi treikam kaba dang sah sa 2 snem, ym dei ban sdang ñiew thymmai biang ïa ka samoi treikam.
