Shillong, Nailur 22
Ka jingïalang General Executive Committee (GEC) jong ka Meghalaya SSA School Association (MSSASA) ka la rai ban rah ïa ka mat ba ïadei bad ka jingpynskhem kam ïa ki nonghikai SSA ha ka jingïalang bah jong ki nonghikai SSA ka ban sa long ha ka 2 tarik Risaw ha Madan Student, Jaïaw.
Ka MSSASA-Sengkmie ha ka Sngi Saitjaiñ ka la pynlong ïa ka GEC ha kaba ki nongïalam na ki shnat bapher-bapher naduh ki Block bad ki distrik hapoh ka Jylla ki la wan ban ïashim bynta.
Ki mat kiba la ïatai ha katei ka GEC ki long halor ki 2 tylli ki mat jingdawa kiba ka seng ka la dawa na ka Sorkar naduh kine ki snem kiba la leit noh – ban pynkiew tulop bad ban pynskhem kam ïa ki nonghikai SSA.
“Hadien ka jingïatai kaba la neh kumba 3 kynta eiei, da kawei ka sur ngi la ïakut ban jied ïa ka mat ba ïadei bad ka jingpynskhem kam ïa ki nonghikai SSA bad ngi la ïakut ruh ba ïa kane ngin sa rah ha ka ‘General Meeting’ ne ka jingïalang bah jong baroh ki nonghikai SSA hapoh ka Jylla kaba ngin sa pynlong ha ka 2 tarik u Risaw mynta u snem ha Madan Student, Jaïaw, naduh ka por 11 baje mynstep,” la ong u President ka MSSASA, Bah Aristotle Rymbai.
Ka seng ka kyrpad ruh ïa baroh ki nonghikai SSA hapoh ka Jylla ban ïawan ryntih lang ha katei ka sngi ba la buh khnang ban ïoh shim ïa ka rai kaba khatduh halor katei ka bynta.
Hashuwa, u President u la ïathuh ba ka seng ka la ïoh ban ïakynduh ïa u Director of School Education & Literacy, uba long ruh u State Project Director, SSA, u Swapnil Tembe bad u Commissioner & Secretary ka tnad pule-puthi, u Vijay K. Mantri ha kaba ka la ïoh jingtip ba na ka liang ka Sorkar Jylla, ka la pynkhreh shaid-shaid ïa ka ‘Cabinet Memorandum’ haba ïadei bad ban pynskhem ïa ka kam ki nonghikai SSA lane ban kdup lang ïa ki nonghikai SSA napoh State Implementation Society ha ka tnad pule-puthi.
