Nongpoh, Nailur 23
Ki Nongïalam jong ka Khun Hynñiewtrep National Awakening Movement (KHNAM) Youth Wing ha ka janmiet jong ka Lah Sngi U Blei ki la hiar sha Civil Hospital Nongpoh ban wad jingtip halor ka jingmih khubor ha kine ki khyndiat sngi ba la dep ha kaba ïadei bad ka jingkhlad jong iwei i khyllung iba dang shu kha hapoh ka jaka leit shabar jong katei ka jaka ai jingsumar.
Ha kane ka sngi, ki Nongïalam ka KHNAM ki la ïoh ruh ban kynduh ïa ka longkmie bad ruh ïa u kurim jong ka ban kylli pyrthew bad wad jingtip halor katei ka jingjia kaba la mih ha ki lad pathai khubor ha kine ki khyndiat sngi ba la dep.
Haba kren sha ki lad pathai khubor, u Bah Joseph H Pyngrope, Working President ka KHNAM State Youth Wing, u la ïathuh ba na ka liang jong ka Medical Superintendent (MS) ka Civil Hospital Nongpoh kam shym la lah satia ban ai jingshai halor ki jingkylli ba la buh hakhmat jong ka, da kaba aidaw ba kan hap ban ap shwa ïa ka kaiphod jingtohkit. U la ïathuh ruh ba na ka liang ka MS jong ka Civil Hospital Nongpoh ka la bthah ïa ki ban wan biang ha kiwei pat ki sngi, kata hadien ba ka la dep ban lum ïa ka kaiphod jingtohkit.
Ha kajuh ka por, utei u Nongïalam ka KHNAM u la ong ruh ba hato ki kyndon aiñ kiba kynthup ïa ka Mother Policy (MP), ka First Referral Unit (FRU) bad ka Antenatal Care ka treikam ne em ha kane ka jaka ai jingsumar bad lada ka treikam ruh, balei katei ka longkmie ka hap ban ïeng palat ar kynta tam shabar ka khyrdop jong kane ka jaka ai jingsumar?.
