Jowai, Nailur:
Ka Joint Action Committee (JAC) ba kynthup ïa ka War Jaiñtia Student Union (WJSU) bad Federation of Khasi Jaiñtia and Garo People (FKJGP) War Jaiñtia Circle ki la dawa ban weng noh ïa u Manager ka ICP hapoh 15 sngi kata naduh ka 23 tarik Nailur haduh 7 tarik Risaw.
Ïa kane ka rai la shim ha ka jingshong jingïalang jong kitei ki ar seng kaba la long ha ka 21 tarik mynta u bnai ha Amlarem. Kane ka jingïalang ka long ban ïathir ïatai halor ka jingshah kyndang jong ki dukan die ja, dukan sha bad dukan die wai dong jong katto-katne ngut ki longkmie ha ki bor pynïaid jong ka ICP ha Dawki.
Ha ka jingïathir, kitei ar seng ki lap ba kine kiei-kiei kiba jia ha ICP Dawki ki long na ka daw jong u Manager uba la pyndonkam bakla ïa ka bor ban thom ïa ki trai shnong ka thaiñ.
Ki ar seng ki la kyntu ïa ka sorkar jylla ban weng noh mardor ïa une u briew khnang ban lait na kano-kano ka jingeh ha ki sngi ki ban dang wan.
