Shillong, Nailur 23
Ha kylleng ki jaka, ka Sorkar ka ju tih ïa ki surok khamtam haba donkam ban tep ïa ki pipe um bad ki kynja waïar kiba hap ban pynïaid lyngba ki surok ha kylleng ki shnong.
Ki don ki surok kiba tih da ka tnat PHE ban pynïaid ïa ki pipe um bad ki don ki surokbah bad surok shnong kiba tih da ki kompani kiba pynïaid ïa ki waïar hadien ba la ai jingai jingbit ka tnat shna surok (PWD Roads).
Hynrei la ju lap ba ki don pat ki surok kiba la shu iehnoh kumto khlem maramot shuh hadien ba la dep ban tih.
Kawei na kum kita ki surok kaba la shu ieh kumto khlem maramot shuh hadien ba la dep tih, ka dei ka bynta jong ka surokbah (National Highway) na Motphran ter ter shaduh Lad Umsohsun.
Katkum ka jingïathuh kiba die jingdie harud surokbah, ki la ong ba ka jingtih ïa kane ka surok ka dei kaba la slem bad la shu ieh kumto khlem maramot shuh haduh kat mynta.
“Ngim tip ki dei na ka tnat aïu jong ka Sorkar kiba tih ïa kane ka surok bad mynta kane ka bynta jong ka surok kaba ki la tih la shu ieh khlem maramot shuh. Lada shu sngap, lehse ki kontraktor kin sa leh klet pynban bad kin nym maramot,” la pynpaw kiba shong die jingdie ha thaiñ Motphran ter ter shaduh Bimola.
Don ruh kiba ïaid lynti kiba ju leit sha Motphran borabor, ki la antad ba kane ka jingpynslem ban maramot ïa ka bynta jong ka surok kaba tih bad pynjot ka dei namarba u kontraktor uba ïoh ïa ka kam, u la kum leh klet namar ym don ba ujor ne pynsngew sha ka Sorkar.
Kumta ki paidbah ki kyntu ïa ka Sorkar ba kan bthah noh mardor ïa u kontraktor ban maramot noh ïa ka bynta jong ka surok kaba tih bad kaba kylla thliew wat hadien ba la dep pyndap mawria kham mynshwa.
Ki la ong ba kino-kino ki kontraktor kiba ïoh ïa ka kam ban tih ïa ka surok ki dei ban maramot noh namar ka jingthliew ka surok ka la buh jingma ym tang ïa kiba ïaid lynti hynrei ïa ki kali ruh kumjuh.
