
Shillong, Nailur 23
Ka Hynñiewtrep National Youth Front (HNYF), Lyngïong-Tyrsad Circle ka la kyntu ïa ki kontraktor kiba pyntrei ïa ka surok Mawphlang-Weiloi ban pyndep noh ïa ka kam shuwa ka lyïur jong u snem ban wan.
“Kaba pynlong ïa ngi ban wan jurip biang sa shisien ïa kane ka surok ka long ba ngi ïohi mynta ba ka bneng ka la ai lad, namar baroh shi katta (por lyïur), kam long ban siang rong, hynrei mynta haba ka bneng ka la ai lad, ngi la wan ban jurip ba haduh katno ka kam ka la dep,” ong u President ka HNYF-Lyngïong-Tyrsad Circle, Bah Winsonwell Kharryngki hadien ka jingjurip ïa ka surok Mawphlang-Weiloi.
“Ngi ïohi ba ka kam kaba bun hi la dep, sah sa tang ban siang ïa ka rong,” u la ong da kaba bynrap ba ka seng kam don da kumwei pat ban ong, hynrei ka kyntu ïa ki kontraktor kiba pyntrei ïa kane ka kam (namarba ka bneng ka la ai lad), ba kin trei pynkloi noh katba lah ban pyndep ïa ka jingsiang rong jong ka surok.
U Bah Kharryngki u la ong ruh ba ki paidbah ki la ap khmih lynti ban ïohi ïa ka jingdep noh jong kane ka surok namarba baroh shi lyïur ki la shah shitom bad ud halor ka jingsniew jong ka.
Haba kylli halor ka jingwad RTI, u la ong ba ka seng kam don eiei ban kynthoh halor katei ka bynta.
Halor ki jaka ba sahteng, u President u la ong ba mynshuwa ha ka por lyïur, la dep ban siang rong hynrei namar ka jinghap u slap bad ka jingïaid jong kiba bun ki kali…la khlong biang ka surok.
“Ngi la ïakren bad ki kontraktor ba la kumno-kumno ban maramot biang ïa kito ki jaka…ki kontraktor ruh ki dei ki Khasi bad kiba sngewthuh ban ïakren bad kim saitlah ne pyneh, hynrei ki pdiang bad kloi ban ai ka jingïatreilang bad ki paidbah,” u la ong.
Ka seng ka kyntu ruh ïa ki 2 ngut ki kontraktor kiba pyntrei ïa ka surok ban leh ïa kaba bha tam na bynta u paidbah haba ïoh ïa ka kam bad ym ban trei tang dep.
“Ngi kyrpad ïa ki kontraktor ban pynkloi katba lah ïa ka kam – haba ka bneng ka dang ai lad, namar lashai lada poi biang sa kawei ka lyïur, ka kam kan sahteng-shi-sahteng, kumta ngim sngewtynnad. Hashuwa ka lyïur, ngi kyntu ïa ki kontraktor ban pyndep noh ïa kane ka surok,” ong utei u nongïalam.
Halor ki jingkynthoh ba ïadei bad ka jingslem jong ka kam, u la bynrap, “Ka dawbah hi haba ïakren bad ki ophisar PWD bad ki kontraktor ka dei namar ka jingslem jong ka ‘Bill’, ha kawei ka liang kaba pynlong ïa ka jingïaid suki jong ka kam.”
Shuh shuh u la kyrpad ïa ka tnad ba dei khmih ban pyrkhat lem ïa ki kontraktor bad ban kham pynkloi ïa ka ‘Bill’ khnang ba ka kam ruh kan ïoh ban ïaid sted.