Shillong, Nailur 23
Ka 22 tarik kan dei ka sngi kaba ka jingshit kyrang ha nongbah Shillong bad ka thaiñ Sohra ka la long shisha kaba heh tam na ka bynta u bnai Nailur, 2024. Ka sien nyngkong ba ka nongbah Shillong ka la mad ïa kum kane ka jingshit kaba jur tam ha u bnai Nailur, ka la dei ha u snem 1973, ha kaba ka jingshit ka la kot shaduh ka 30.2 degree Celsius.
Ha kane ka sngi, ka nongbah Shillong ka la mad ïa ka jingshit kyrang kaba la poi haduh ka 29.9 degree Celsius katba ka thaiñ Sohra ka la mad ïa ka jingshit kaba la poi shaduh ka 33.1 degree Celsius.
Ïa kane ka jingshit ba jur tam ha ka 22 tarik mynta u bnai, la pyntip da ka IMD Meteorological Centre, Shillong ka shlem treikam kaba peit ïa ka jinglong-jingman ka mariang bad la ong ba ka jingshit kaba heh tam ha u bnai Nailur mynta u snem, ka dei ha ka 22 tarik.
Katkum ki jingthoh kiba la don, ka la pyni bad kdew ba lada ka jinglong ka mariang ka long kumba la ju long ha ki por bad ki snem kiba la leit, ka jingshit ha u bnai Nailur la ka long ha ka nongbah Shillong bad thaiñ Sohra, ka ju poi tang haduh 23.3 degree Celsius eiei.
Katkum ki jingpynbiang jingthoh da ka Climate Research & Services, Pune, India Meteorological Department, Ministry of Earth Sciences jong ka Sorkar India, la paw ba ha ki snem 1991, 92 bad 93 ka jingshit ha u bnai Nailur ha nongbah Shillong ka long ym palat ïa ka 27 degree Celsius (kata haba phai sha ka Maximum) hynrei hadien ka 2000 snem shaneng, ka jingshit ka la kiew.
Mynta u snem, tang ha u bnai Nailur, la sakhi ba ka jingshit ha kiba bun ki sngi ka la long beit palat ïa ka 27 degree Celsius, kumjuh ruh ha ka thaiñ Sohra la sakhi ba ha kiba bun ki sngi, ka jingshit ka la tam palat ïa ka 30 degree Celsius.
