Shillong, Nailur 23
Ka North East Students Organization (NESO) ka la dawa na ka Sorkar Pdeng ban pynngat ïa ki shipai kiba donkti ha ka jingjia shah pynïap ha Oting, Nagaland bad ban pyndam noh shi syndon ïa ka Armed Forces Special Powers Act (AFSPA) hapoh ka Thaiñ Shatei Lam Mihngi.
Ka seng ha ka kyrwoh khubor ka pynpaw ka jingsngewsih jur halor ka rai ba dang shen jong ka Supreme Court ka Ri India ha kaba ïadei bad ka jingjia shah pynïap ha Oting, Nagaland.
Katei ka jingjia ba sngewsih, kaba la jia ha ka 4 tarik Nohprah, 2021, ha Mon distrik, Nagaland, ka la sakhi ïa ka jingshah pynïap dusmon jong 14 ngut ki ‘riew paidbah ba lui-lui, ha ki shipai jong ka 21 Para (SF), ka kynhun jong ka tnad shipai Indian Army.
“Wat hapdeng ki sakhi kiba bun kiba la lap da ka kynhun tohkit ba kyrpang (SIT), la ïathuh ba ka ïingbishar ba ha khlieh duh ka ri, ha ka 17 tarik u Nailur, 2024, ka la pynkut noh ïa ka jingbishar pyrshah ïa ki shipai ba la shah kynnoh. Kane ka rai ka dei ka jingkyntait ïa ka hok jong ki lanot bad ki bahaïing-bahasem jong ki, kiba la ïai ap na bynta ka jingkitkhlieh jong kito kiba donkti,” ong u Chairman ka NESO, Bah Samuel B. Jyrwa ha ka kyrwoh khubor.
U la ong ruh ba ka SIT, kaba la thaw da ka Sorkar Nagaland, ka la pynlong ïa ka jingtohkit kaba bniah bad ka pyni ïa ki sakhi kiba bun bah – kiba pyni ïa ka jingdonkti jong 30 ngut ki briew ka 21 Para (SF), kynthup ïa ki heh ophisar haba ïadei bad ka jingjia ha Oting.
“Ïa ka jingmudui la aiti sha ka District bad Sessions Court jong ka Mon, hynrei ka Sorkar Pdeng ka la kyntait ban ai jingbit haba ïadei bad ka jingshah pynngat jong ki. Kane ka jingbym don ka jingkitkhlieh ka pyntlot ïa ka rukom treikam jong ka aiñ bad ka pynjah burom ïa ka kyndon aiñ, khamtam ha ka thaiñ ba don jingma jong ka Thaiñ Shatei Lam Mihngi, ha kaba ki jingbymhok ha ki khana mynbarim ki la iehnoh ïa ki dak kiba jylliew,” ong utei u nongïalam.
Ha kajuh ka por, u la ong ba ka rai jong ka Supreme Court ka pynjur tang ïa ka jingsngew marwei kaba ki paidbah ka Thaiñ Shatei Lam Mihngi ki sngew, khamtam namarba ka ïingbishar hi ka la kam ba ka mukotduma ka lah ban ïaid shakhmat lada ka Sorkar Pdeng ka ai ïa ka jingbit ban pynngat ha ki kyndon aiñ.
“Kane ka jingeh na ka liang ki bor synshar ka kdew ïa ka dak jingma – ba ka jingim ki ‘riew paidbah, khamtam kito kiba na ki jaka ba shah iehnoh beiñ jong ka Thaiñ Shatei Lam Mihngi, kim long kiba donkam hapoh ka jingkdup jong ka aiñ ïak-ja-kor – Armed Forces Special Powers Act (AFSPA),” u la ong. Na ka por sha ka por, ka NESO bad ki kynhun ba don bynta ha ka, ki la dawa ban pyndam noh ïa ka AFSPA, ka aiñ kaba ïai bteng halor ka jingleh donbor, ka jingbym shah pynshitom, bad ka jingpynkheiñ ïa ki hok longbriew-manbriew ha kylleng ka Thaiñ Shatei Lam Mihngi.
“Ka jingjia ha Oting ka long sa kawei pat ka jingpynkynmaw kaba sngewsih halor kumno ka AFSPA ka pynlah ïa kum kine ki kam shyrkhei ban jia khlem da don kano-kano ka jingkitkhlieh,” u la ong. Shuh shuh u la bynrap ba ka NESO ka dawa na ka Sorkar Pdeng ban pynngat mardor ïa ki shipai 21 Para (SF) kiba donkti ha ka jingjia shah pynïap ha Oting bad ban pynïoh ïa ka hok jong ki lanot bad ki bahaïing- bahasem jong ki.
“Ngi pynkynmaw biang ruh ïa ka jingdawa kaba la slem bah ban pyndam noh shi syndon ïa ka AFSPA ha ka Thaiñ Shatei Lam Mihngi, ka aiñ ka bym don jaka ha ka synshar paidbah. Ka jingbym lah ban leh kumta kan pynjylliew tang ïa ka jingbym shaniah bad ka jingleh donbor ha ka thaiñ,” ong u Bah Jyrwa.
